Tur aña riba 2 di yüli, Kòrsou ta selebrá dia di himno i bandera. E dos símbolonan nashonal di mas grandi di e isla tin historianan profundo ku ta reflehá e orguyo i union di e pueblo kurasoleño.

E bandera di Kòrsou, ku su kolónan bibu blou i hel, tin un historia remarkabel. Promé ku tabatin un bandera propio, Kòrsou tabata usa e bandera di Antia Hulandes. Riba inisiativa di Konseho Insular, a bini ku un konkurso pa outornan lokal por a duna nan bista riba kon e bandera di Kòrsou mester a keda.

For di e kantidat di diseñonan ku a drenta, un hurado a skohe e diseño di e hóben kurasoleño Martin den Dulk.

E bandera a keda ofisialmente instalá i hisa pa promé biaha riba 2 di yüli 1984, na e ehekutivo di e teritorio insular e tempu ei.

Nifikashon di e kolónan:

• Blou: Ta representá shelu i laman ku ta rondoná e isla. E blou ariba ta e shelu i e blou abou ta laman Karibe.
• Hel: Ta representá e solo briante ku ta bria riba Kòrsou.
• E dos streanan blanku: E strea grandi ta representá Kòrsou i e strea mas chikí ta representá Klein Kòrsou. E sinku puntonan di kada strea ta simbolisá e sinku kontinentenan for di kual e habitantenan di Kòrsou ta provení.

  

Meskos ku e bandera, e himno di Kòrsou, tin un nifikashon generoso ku ta deskribí amor pa e tera, herensia i determinashon di e siudadanonan.

E letra original a keda skirbí pa Frater Radulphus i e letra a keda adaptá pa Guillermo Rosario, huntu ku un komishon kaminda figuranan manera Mae Henriquez i Enrique Muller a duna nan aporte pa hasié un orguyo den idioma Papiamentu. E areglo musikal a keda den man di Padu del Caribe i Errol "El Toro" Colina.

Ounke melodia tabata eksistí for di rondó di 1898 generalisá komo un kanto di skol, e letra ofisial na Papiamentu a keda aprobá i outorisá pa Konseho Insular añanan despues. E Himno a keda ofisialmente proklamá na 26 di yüli 1978.

Advertisement