Haf di Boneiru a realisá un ehersisio anual di siguridat huntu ku Carnival Cruise Line, komo parti di eksigensianan di International Ship and Port Facility Security Code (ISPS) i e proseduranan lokal di siguridat.

E ehersisio a tuma lugá den forma di un "tabletop exercise", ku partisipashon di representantenan di Carnival Horizon, outoridatnan relevante na Boneiru i e Fleet Operations Center na Miami.

Advertisement

Tèst di prosedura i komunikashon

E ehersisio tabata enfoká riba e manera ku haf, e barku, outoridatnan lokal i servisionan ousiliar lo reakshoná den kaso di un insidente di siguridat.

Durante e ehersisio a evaluá diferente parti di e plan di siguridat di Haf di Boneiru. Esaki a inkluí proseduranan pa oumentá òf baha nivel di siguridat operashonal, komunikashon entre e barku i outoridatnan na tera, i un evakuashon hipotétiko di pasaheronan.

Tambe a tèst e kolaborashon entre diferente instansia lokal, inkluyendo Polis, Koninklijke Marechaussee, hòspital i kuerpo di bombero. Atenshon a bai na e interkambio di informashon, repartishon di tarea i koordinashon durante un posibel insidente.

Ehersisio anual

Segun e eksigensianan di siguridat vigente, Haf di Boneiru mester realisá regularmente ehersisionan di e tipo akí. Mínimo un ehersisio mester tuma lugá kada aña, i e periodo entre dos ehersisio no por ta mas largu ku 18 luna.

E ehersisio anual ta duna e instansianan envolví posibilidat pa evaluá nan proseduranan i kolaborashon den kaso di un insidente di siguridat.