Onima Aloë NV, Boneiru su úniko plantashi komersial di aloë vera, ta kore peliger di pèrdè su tereno di kunuku banda di Institushon Korekshonal di Hulanda Karibense. Direktor Jaap Ensing a indiká ku el a keda informá dor di Entidat Públiko Boneiru (OLB) tokante terminashon di akuerdo di hür pa e tereno di mas o ménos 10 hektar ku e kompania ta usando for di 2008. E akuerdo di hür a keda firmá 10 di yüli 2008, i ta renobá anualmente for di e tempu ei.

Segun doño Jaap Ensing den un karta manda na gezaghèber na fin di yüni, no solamente el a wòrdu informá via un òrdu di deurwaarder ku e mester a tuma kontakto ku OLB, pero akseso na su kunuku a keda blòkiá. Ensing ta deklará ku e lòk na su porta di entrada a wòrdu kita i remplasá ku un otro lòk, strobando e di drenta riba e propiedat. Segun e, gastunan di e òrdu di deurwaarder a suma 180 dòler. E ta bisa ku esaki a sosodé sin previo aviso, notifikashon, òf konsulta di parti di OLB. Poko despues, a sigui un reunion den kua el a wòrdu informá ku OLB ta tuma e tereno bèk i pone esaki disponibel pa Ministerio di Defensa, segun informe pa uso di Koninklijke Marechaussee di Hulanda (KMar). 

Motibunan segun OLB
Durante reunion di 9 di yüli, OLB a menshoná vários motibu pa e desishon:

• Supuestamente tersernan tabata usa parti di e sitio sin pèrmit di OLB;
• Tabatin insufisiente aktividat riba e plantashi i inaktividat di negoshi;
• Un konekshon di awa supuestamente tabata kore for di konekshon di WEB di e plantashi pa un kompania pegá, loke, segun OLB, no tabata legal.

Adishonalmente, OLB a indiká ku interes general di e zonifikashon previsto pa Defensa ta surpasá e uso aktual di e tereno di Onima Aloë NV.

Segun Ensing, OLB a indiká ku no tin posibilidat pa kontinuá ku e plantashon riba un pida mas chikitu di e tereno i ku lo no ofresé ningun pida tereno di kunuku alternativo. Ademas, lo no tin kompensashon finansiero pa invershonnan anterior kalkulá na $300,000, pèrdida potensial di produkshon, i gastunan di un posibel mudansa. 

Reakshon di Onima Aloë
Ensing ta den opheshon kontra di OLB. Segun e, su kompania ta aktivo ainda i produktonan di Onima Aloë ta wòrdu bendí na vários sitio na Boneiru. El a referi na un estrakto resien di Kamara di Komersio den kual e kompania ta registrá komo aktivo. Pa loke ta trata uso di e tereno na un terser partido, Ensing a deklará ku añanan pasá el a pèrmití pa un parti chikí di e tereno keda usá pa trabounan na e prizòn, sin ku el a risibí ningun kompensashon p’esaki. Tambe e ta konfirmá ku un kompania bisiña ta uza un konekshon di awa for di su konekshon di WEB, i ku, segun e, konsumo di awa semper a keda pagá.

Ensing a rechasá e akusashon di inaktividat riba e plantashi. Segun e, aloë vera ta un kultivo ku ta eksperensiá periodonan largu ku poko aktividat visibel i ta kosechá solamente despues di áwaseru òf irigashon.

Konsekuensianan pa e kompania
Segun Onima Aloë, tin mas o menos 15.000 mata di aloë vera plantá riba e tereno. Ensing ta bisa ku último añanan, alrededor di 300.000 dòler a keda invertí den desaroyo di e plantashi i e infrastruktura nesesario.

E ta teme ku terminashon di e akuerdo di hür lo tin konsekuensianan grandi pa kontinuidat di negoshi. E ta señalá ku un mata di aloë vera mester di mas o ménos tres aña promé ku e ta kompletamente produktivo atrobe despues di mudamentu òf replantashon. Segun Ensing, e daño total por suma na miles di dòler si produkshon stop i si mester desaroyá un lokalidat nobo. 

Apelashon basá riba balor kultural-históriko
Den su karta na OLB, Ensing ta enfatisá tambe e nifikashon kultural-históriko di kultivo di aloë na Boneiru. Segun e, kultivo di aloë vera ta forma parti di historia di Boneiru for di siglo diesnuebe, i e forma di agrikultura aki ta kuadra bon meimei di metanan di sostenibilidat i outosufisiensia ku OLB mes kier siguí.

E ta hasi un yamada na OLB pa reevaluá e desishon proponé, teniendo na kuenta balor ekonómiko, sosial i históriko di e plantashi i konsekuensianan pa su kompania.

Petishon ta risibí sosten amplio
Miéntras tantu e sosten públiko pa preservashon di e plantashi tambe ta kresiendo. A lansa petishon “Salba Boneiru su úniko plantashi di aloë” riba Petitions.nl, ku e deklarashoon ku Entidat Públiko Boneiru tin intenshon di terminá akuerdo di hür di e plantashi i asigná e tereno agrikula na Koninklijke Marechaussee di Hulanda. Segun e petishon, esaki ta menasá herensia lokal, agrikultura sostenibel, i un kadena di produkshon eksistente.

Ne momentunan aki e petishon a keda firmá mas ku 1.180 biaha, loke ta demostra ku hopi residente i simpatisante ta sostené preservashon di e plantashon di aloë.

Advertisement