Tourism Corporation Bonaire (TCB) a publiká sifranan turístiko preliminario pa luna di yüni 2026. E datonan ta mustra ku Boneiru a risibí un total di 13.387 bishitante stayover, representando un bahada moderá di 1,6% kompará ku e mesun luna na 2025, ora ku 13.606 bishitante a yega na nos isla.

Hulanda a sigui ta e merkado prinsipal di Boneiru durante lune di yüni, ku 5.389 bishitante, ku ta representá 40,3% di tur e yegadanan. Merka a sigui na di dos lugá ku 4.163 bishitante, ku ta forma 31,1% di e total.

Direktor di Tourism Corporation Bonaire (TCB), Elesiër Angel, a indiká ku TCB ta sigui monitoriá e desaroyonan den sektor turístiko i ku e sifranan resiente ta mustra un tendensia ku meresé atenshon. Segun Angel, e resultadonan ta reflehá e importansia di sigui invertí di manera struktural den turismo pa sostené e posishon di Boneiru komo destinashon den Karibe.

Sektor di  turismo ta un sektor ku ta rekerí invershon kontinuo den marketing i desaroyo di produkto . Sengun Angel, invershon den desaroyo di produkto i mehorashon di eksperensia di bishitante ta importante pa Boneiru sigui ta kompetitivo den e merkado.

Entre e bishitantenan for di Merka, mayoria a biaha ku un partner, siguí pa esunnan ku a viahá nan so. E motibonan prinsipal di bishita tabata fakansi (48,5%), sambuya (40,3%) i bishita amigu i famia (3,1%). En kuanto hospedashon, mayoria a keda den un hotèl (58,6%), siguí pa vila (11,6%), nan propio bibienda (7,3%), apartamento (5,6%) i serka famia (4,1%). Mayoria di e bishitantenan merikano a bini for di Florida, Texas, California, Pennsylvania i North Carolina. E grupo di edat di 45 te ku 54 aña tabata e mas grandi (20,6%), siguí pa e grupo di 55 te ku 64 aña (19,8%).

Merkado Hulandes

Pa e merkado hulandes, mayoria di e bishitantenan a biahá nan so, siguí pa esunnan ku a biaha ku un partner. E motibo prinsipal pa bishitá Boneiru tabata fakansi (70%), bishita amigu i famia (10,4%) i negoshi (6,8%). Mayoria a hospedá den un hotèl (51,3%), siguí pa apartamento (13%), serka famia (11%), den nan propio bibienda (5,4%) i den un vila (4,5%). Bishitantenan hulandes a bini prinsipalmente for di Zuid-Holland, Noord-Holland, Noord-Brabant, Gelderland i Utrecht. E segmentonan di edat mas grandi tabata e grupo di 55 te ku 64 aña (23,5%) i e grupo di 25 te ku 34 aña (20,6%).

Otro merkadonan importante durante luna di yüni 

• Kòrsou: 1.893 bishitante (14,1%)
• Aruba: 264 bishitante (2,0%)
• Bélgika: 230 bishitante (1,7%)
• Colombia: 166 bishitante (1,2%)
• Alemania: 153 bishitante (1,1%)
• Canada: 100 bishitante (0,7%)
• Suisa: 94 bishitante (0,7%)
• Argentina: 94 bishitante (0,7%)
• Brazil: 84 bishitante (0,6%)

April, mei i yüni 2026

Durante di dos kuartal di 2026, Boneiru a registrá un total di 47.366 bishitante stayover. Den luna di aprel, Boneiru a risibí 18.778 bishitante, representando un bahada di 0,4% kompará ku aprel 2025. Den mei, Boneiru a registrá 15.201 bishitante, un oumento di 1,6% kompará ku e mes luna na aña pasa. Yüni a sera e kuartal ku 13.387 bishitante stayover, representando un bahada di 1,6% kompará ku na yüni 2025.

E sifranan ta mustra variashonnan limitá entre e tres lunanan kompará ku e mes periodonan na 2025. Mei tabata e úniko luna den kua un oumento a keda registrá, miéntras ku aprel i yüni a registrá bahadanan moderá.

Advertisement