Kolegio di Supervishon Finansiero pa Boneiru, Sint Eustatius i Saba (Cft) a ekspresá su preokupashon tokante e manera ku Kolegio Ehekutivo di Boneiru a anunsiá i kuminsá ehekutá supsidio temporal di energia di 6 mion dòler. Segun Cft, Kolegio Ehekutivo a aktua den kontradikshon ku Lei di Finansa di Entidatnan Públiko di Boneiru, Sint Eustatius i Saba (Lei FinBES), pasobra e medionan finansiero nesesario no tabata aprobá formalmente via un kambio di presupuesto.

E supsidio ta destiná pa aliviá e impakto di oumento di tarifa di elektrisidat pa habitantenan di Boneiru. E tarifa variabel di elektrisidat a subi ku aproksimadamente 30% entrante 1 di yüli 2026. E medida temporal ta destiná pa e periodo di sèptèmber te ku desèmber 2026.

Advertisement

Cft: kompromisonan finansiero sin aprobashon di presupuesto

Den un konseho fechá 22 di òktober 2026, Cft ta indiká ku Kolegio Ehekutivo a skohe pa anunsiá e supsidio sin kondishon i duna Water- en Energiebedrijf Bonaire (WEB) instrukshon pa kuminsá ehekutá e medida, promé ku e medionan finansiero nesesario tabata inkorporá formalmente den presupuesto.

Segun Cft, esaki a krea un obligashon finansiero. E echo ku pagonan di e supsidio lo tuma lugá solamente despues di aprobashon di e kambio di presupuesto no ta kambia e evaluashon aki. Lei FinBES ta stipulá ku Entidat Públiko Boneiru por asumi solamente obligashonnan ku ta den un presupuesto òf kambio di presupuesto aprobá. Pa obligashonnan ku no ta inkluí den esaki, mester sigui e prosedura di aprobashon relevante promé ku asumí e obligashon.

Den kaso di urgensia, tin un prosedura spesífiko ku ta permití Konseho Insular, bou di sierto kondishonnan, pa disidí ku por asumí un obligashon promé ku aprobashon di presupuesto. Sin embargo, un moshon di Koseho Insular no ta konta komo un desishon bálido pa esei. Ademas, Cft ta señalá ku Kolegio Ehekutivo no a tuma kontakto ku nan pa diskutí e posibilidatnan pa un proseso di desishon mas lihé.

Finansiamentu ta bini di presupuesto i reserva eksistente

Ku e di kuater kambio di presupuesto propuesto pa 2026, ta pone 6 mion dòler disponibel pa e supsidio di energia. E finansiamentu ta bini di dos fuente.

Un suma di aproksimadamente 2,6 mion dòler lo bini di presupuesto di operashon ku, segun e ekspektativanan, no lo mester usa kompletamente durante 2026. Entre e partidanan aki tin 1,1 mion dòler destiná pa Bibienda i Infrastruktura/FCB i 350.000 dòler di Konseho Insular.

E otro 3,4 mion dòler lo bini di diferente reserva destiná. Entre esakinan tin 1,5 mion dòler ku tabata destiná pa e kontribushon na gastunan di operashon di e instalashon di tratamentu di awa sushi (RWZI) i 600.000 dòler pa Renobashon di Gobernashon 2024.

Ku e modifikashon di presupuesto aki, ta transferí medionan di kategoria di biennan i servisio pa e kategoria di transferensianan di entrada, den forma di supsidio. Ounke e presupuesto ta keda den balansa, Cft ta atvirti ku e medida por tin konsekuensia pa e espasio finansiero disponibel di Boneiru.

Preokupashon tokante invershonnan di futuro

Segun e presupuesto di 2027 proponé, Boneiru lo tin 8,3 mion dòler di likides liber disponibel pa 1 di yanüari 2027. Sinembargo, Cft ta atvertí ku e suma aki por duna un imágen muchu positivo di e situashon finansiero, si no tuma na kuenta e invershonnan planifiká i e sosten finansiero previstó pa Selibon. Sin e supsidio di energia, tabatin e ekspektativa ku lo tin un gastu di presupuesto mas abou ku loke tabata planifiká pa 2026. Esaki por a resultá den un resultado finansiero positivo i, komo konsekuensia, mas likides disponibel.

Cft ta preokupá ku e uso di e medionan aki pa e supsidio por limitá e posibilidatnan pa finansia invershonnan den futuro i otro gastunan ya anunsiá. Cft ta mustra komprondementu pa e deseo di Kolegio Ehekutivo pa protehá habitantenan kontra oumento fuerte di preis di energia. Na mes momentu, e ta indiká ku un medida asina ta toka área di maneho di entrada, un tereno ku ta kai bou di responsabilidat di Gobièrnu Sentral di Hulanda.

Segun Cft, ta keda importante pa evaluá kuidadosamente e konsekuensianan finansiero di e medida riba término largu.

Supsidio mester tin un límite klaro

Banda di e obligashonnan relashoná ku e presupuesto, Cft ta pidi mas klaridat tokante kondishonnan finansiero di e supsidio. E supsidio lo wordu apliká mediante un redukshon temporal di e tarifa variabel di elektrisidat, i gastunan final lo dependé di e konsumo real di elektrisidat. P'esei, e suma por resultá mas haltu òf mas abou ku e 6 mion dòler ku a presupuestá.

Cft ta konsehá Kolegio Ehekutivo pa stipulá eksplísitamente ku e supsidio no ta sin límite finansiero. E suma eksakto di e supsidio mester dependé di e konsumo real, ku un máksimo di 6 mion dòler. Tambe mester keda kla ken lo karga ku kualke gastu ku pasa e límite aki. Pasobra WEB ta un empresa den kua gobièrnu tin partisipashon, kualke défisit finansiero di e empresa por tin konsekuensia pa e finansa di Entidat Públiko Boneiru. Cft ta pidi pa determiná tambe di antemano kiko lo sosodé ku kualke suma ku keda, si e konsumo di elektrisidat resulta mas abou ku loke tabata sperá.

Kolegio Ehekutivo mester mustra e konsekuensianan finansiero

Cft ta konsehá Kolegio Ehekutivo pa mustra klaramente, den e di kuater kambio di presupuesto di 2026, kon e supsidio di energia lo afektá posishon di likides di Boneiru riba término di varios aña. Den e análisis, mester inkluí rekomendashonnan ku Cft a hasi anteriormente den su konseho tokante presupuesto di 2027.

E konseho a keda emití riba 22 di òktober 2026 i ta dirigí na presidente di Kolegio Ehekutivo di Boneiru. E karta ta firmá pa Hans Hoogervorst, presidente di Kolegio di Supervishon Finansiero pa Boneiru, Sint Eustatius i Saba.