Den un kaso ku a trese hopi diskushon den futbòl Boneriano, Komishon di Arbitrahe di FFB a tuma un desishon final riba e kaso di hùgadó A. Winklaar. Riba 30 di september 2026, e komishon a anulá e desishon di Komishon di Apelashon i a deklará Winklaar no elegibel pa hunga.

Den e kampionato di futbol 2025/2026, mientras ekiponan tabata disputá play-offs, S.V. Flamingo a presentá un protesta kontra S.V. Real Rincon, alegando ku e hùgadó A. Winklaar tabata inlegal pa hunga. Flamingo a haña rason den e protesta, despues di kua Real Rincon a apelá e desishon i a haña rason den e apelashon. Awor, Komishon di Arbitrahe a tuma un desishon final den e kaso. Komishon di Arbitrahe di Federashon Futbòl Boneiru (FFB) a determina ku Komishon di Apelashon no tabata legalmente formá segun Statuto i Regulashon Interno di FFB. Pa motibu ei, e komishon a anulá e desishon di Komishon di Apelashon i a tuma un desishon final den e kaso tokante elegibilidat di hùgadó A. Winklaar.

Advertisement

Den su resolushon, Komishon di Arbitrahe a konkluí ku Komishon di Apelashon no tabata kumpli ku e rekerimentu mínimo di tres miembro aprobá pa Asamblea General. Ademas, un di e personanan ku a firma e desishon no tabata figurá riba e lista ofisial di miembronan aprobá. Komishon di Arbitrahe a konsiderá ku esaki ta hasi e komishon di apelashon prosedimentalmente inbálido i sin outorisashon pa tuma desishonnan ku balides legal.

Debí ku no tabatin un òrgano di apelashon legalmente formá pa trata e asunto atrobe, Komishon di Arbitrahe a deklará su mes kompetente pa tuma un desishon final pa garantisá kontinuidat.

Den e kaso, e komishon a determina ku A. Winklaar no a kumpli ku e rekerimentunan di inskripshon manera preskribí den e Regulashon Interno. Konsekuentemente, e hùgadó a ser deklará no elegibel pa partisipá den kompetensianan ofisial.

Direktiva di S.V. Real Rincon a publiká un deklarashon ofisial despues di e desishon, indikando ku e klup ta respetá e fayo di Komishon di Arbitrahe.

“Mas ku kla, nos ta respetá e desishon aki. Pèrdida kondishonal i inkondishonal tambe ta konta pa S.V. Real Rincon,” asina e deklarashon ta bisa.

Sin embargo, e klup a enfatisá ku, segun nan, FFB nunka a informá Real Rincon for di komienso ku tabatin un dokumentu ku no tabata na ordu. Segun e klup, FFB mes a aprobá i publiká un dispensashon pa hùgadó A. Winklaar den Órgano Ofisial nr. 2025/2026-11 di 11 di desèmber 2025, i posteriormente a rekonfirmá esaki den Órgano Ofisial nr. 2025/2026-29 di 14 di mei 2026, permitiendo e hùgadó partisipá den e kampionato 2025/2026.

Real Rincon a indiká ku solamente despues ku e hùgadó a partisipá den kuater partido, un protesta a ser presentá alegando ku e no tabata legalmente elegibel. E klup a sostené ku durante e proseso di tratamentu di e kaso, dokumentashon korekto no a ser aseptá, añadiendo ku e studiante en kuestion sí a kompletá su estudio ku éksito.

“Pa añanan largu, S.V. Real Rincon a boga pa nos hóbennan eduka nan mes i sigui studia, miéntras nan ta sigui praktiká e deporte ku nan ta stima. Nos ta orguyoso di apoyá e tipo di desaroyo aki,” e direktiva a deklará.

E klup a pone enfásis riba su trayektoria den futbol Boneriano, señalando ku durante añanan a kontribuí na desaroyo di hùgadónan ku a representá Boneiru den Selekshon Nashonal.

Ademas, Real Rincon a alegá ku durante e periodo ku e kampionato tabata paralisá, e intenshon di e nuebe ekiponan ku a forma un direktiva interino tabata pone preshon pa eliminá e klup kompletamente for di kompetensia.

Apesar di e resultado, e direktiva a indiká ku nan no ta intimidá pa e desishon tuma.

“S.V. Real Rincon no ta spanta pa e desishon tuma. Pa bo ta kampion, bo mester por gana e kampion riba kancha,” e deklarashon ta konkluí.

Real Rincon a sera su mensahe gradisiendo su simpatisantenan i fanatikonan pa nan apoyo kontinuo, afirmando ku e klup lo sigui firme i prepará pa enfrentá futuro retonan.