Frakshon M21 den Konseho Insular di Boneiru a pidi Kolegio Ehekutivo (Bestuurscollege) pa duna dokumentashon ofisial tokante desishon pa transferí USD 6 mion na WEB Bonaire N.V. pa kubri gastunan di elektrisidat riba kuenta di su klientenan.

Di unda e plaka ta bin?

Advertisement

Den un karta fecha 7 di òktober 2026, Líder di frakshon M21, Désirée E. Coffie, ta pidi entre otro pa splika kua desishon di Kolegio Ehekutivo ta sirbi komo base pa e transferensia finansiero i for di kua post presupuestario e fondo ta bin. Tambe e konsehal ta puntra si tabatin un kambio di presupuesto pa hasi e transferensia posibel i si Konseho Insular a tuma un desishon tokante e gastu.

E preguntanan aki ta di importansia, pasobra ta trata di un suma konsiderabel di plaka públiko. E gastu di USD 6 mion por tin konsekuensia pa e presupuesto di Boneiru i pa otro obligashonnan finansiero di Entidat Públiko. P’esei, M21 kier sa no solamente kon e sosten finansiero pa WEB ta struktura, sino tambe di unda e fondo ta bin i kua base legal ta sostené e desishon.

M21 ta pidi base legal i kondishonnan di e kontribushon

Ademas di e pregunta tokante fuente di e plaka, M21 ta pidi pa risibí e base hurídiko di e kontribushon, inkluso disposishonnan relevante di Lei di Finansa Públiko di Entidatnan Públiko (FINBES).

Frakshon M21 kier sa tambe si e USD 6 mion ta trata di un supsidio, un kompensashon finansiero, un garantia òf un otro forma di sosten finansiero i ta pidi pa haña tur kondishon, obligashon i akuerdo tokante rendishon di kuenta ku ta konektá na e kontribushon.

Segun e karta, M21 ta hasi e petishon di akuerdo ku artíkulo 48 di e Reglamento di Órdu di Konseho Insular.

Kambio di presupuesto

Ora ku Gobièrnu di Boneiru kier hasi un begrotingswijziging (kambio den presupuesto), e mester sigui un proseso pa mustra di unda e plaka ta bin i kon e lo usa e fondo.

Promé, Kolegio Ehekutivo mester splika pakiko e gastu ta nesesario i di kua post di presupuesto e plaka lo sali. Departamento di Finansas mester kontrolá si e gastu ta finansieramente i legalmente posibel.

Si e presupuesto aktual no tin sufisiente fondo pa kubri e gastu, por tin mester di un kambio den presupuesto. Den e kaso ei, Kolegio Ehekutivo mester presentá e propuesta na Konseho Insular pa trata i aprobá, di akuerdo ku e prosedura legal. Despues, e kambio mester sigui e proseso di aprobashon finansiero ku ta aplikabel, inkluso di CFT i minister relevante di Hulanda.