Ku tres wega hungá den Concacaf Nations League, Boneiru ainda no a logra gana un punto. E selekshon nashonal a kai vensí 3-2 kontra Grenada, djasabra 3 di òktober den un duelo kaminda e ekipo a pèrdè na bentaha di dos gol.

E resultado ta pone Boneiru na e último lugá di Grupo C. Cuba i Saint Kitts i Nevis ta kompartí e promé puesto ku 7 punto kada un, mientras ku Grenada a logra subi na 3 punto.

Advertisement

Boneiru a kuminsá e enkuentro di manera positivo. Den e promé mitar di e wega, Ayrton Cicilia a habri e markadó, mientras ku Myron Bostdorp a amplia e diferensia promé ku e ekip a bai half time. Esaki a duna Boneiru un liderato di 2-0 despues di 45 minuut.

Myron Bostdorp a marka un momento spesial den e partido kontra Grenada. Su gol a bira e di 52 gol den weganan ofisial den historia di Selekshon di Boneiru. Pa Bostdorp mes, tabata su promé gol ku e selekshon nashonal. Ku esaki, el a bira e di 27 hungadó ku a logra marka por Boneiru den un partido ofisial.

Despues di half time, e desaroyo di e partido a kambia. Grenada a redusí e diferensia ku un pinalti konbertí pa Myles Hippolyte. Poko despues, Benjamin Ettienne a pone e markadó igual ku un gol di kabes.

Ku e skor na 2-2, e partido a sigui habrí pa tur dos banda. Na e di 69 minuut, Caleb Redhead a marka e gol ku finalmente a definí e resultado na benefisio di Grenada.

Pa Boneiru, esaki ta e di tres derota konsekutivo den e kompetensia. Anteriormente e ekipo a pèrdè kontra Saint Kitts i Nevis i despues kontra Cuba. Te awor, e selekshon a marka tres gol i a risibí shete kontra.

E siguiente reto ta mañan 5 di òktober. Boneiru lo enfrentá Grenada atrobe den e torneo. Ku ainda tres partido restante den e fase di grupo, e selekshon ta buskando su promé punto.