Direktorado di Supervishon i Mantenshon di Lei (DT&H) ta intensifiká supervishon riba stèntnan di kuminda i establesimentunan di hóreka durante Festival di Regata, ku e meta pa garantisá higiena i seguridat di kuminda pa tur bishitante.

Manera kustumber, DT&H a organisá un seshon informativo pa tur doño di stènt ku ta bende kuminda promé ku e festival. E reunion a tuma lugá dia 9 di òktober na SKAL, kaminda funshonarionan di Departamento di Komunidat i Kuido a splika e reglanan i eksigensianan pa prepará i sirbi kuminda di un manera sigur.

Advertisement

Durante e kontrolnan, a konstatá ku mayoria di e stèntnan di kuminda tabata na òrdu. Sin embargo, algun stènt a risibí instrukshon pa mehorá sierto puntonan relashoná ku higiena. Ademas, un establesimentu di hóreka den e área di festival a sera pa motibu di higiena.

DT&H ta indiká ku e kontrolnan riguroso lo sigui durante Regatta pa vigilá ku tur negoshi ku ta prepará i bende kuminda ta kumpli ku reglanan vigente di higiena i seguridat di kuminda.

Direktorato ta hasi un yamada na tur doño di stènt i operadó di hóreka pa tuma e reglanan na serio i mantené nan instalashon i proseso di preparashon di kuminda na e nivel di higiena rekerí.

Ku e medidanan aki, DT&H ta buska pa protehá salubridat públiko i kontribuí na un Festival di Regata mas sigur pa tur hende.