Konteo a kuminsá ofisialmente pa e di 59 edishon di Bonaire Sailing Regatta, ku lo tuma lugá for di 12 te ku 16 di òktober 2026. Durante un konferensia di prensa riba 26 di mei ultimo, fundashon organisadó Aquaspeed a anunsia ku preparashonnan pa e evento ya ta den ful swing, ku enfoke fuerte riba informá bishitantenan internashonal i partisipantenan lokal na tempu tokante e fechánan i programa di kompetensianan.

Segun e organisadónan, kuminsá komunikashon tempran ta esensial pa atraé nabegadónan, sostenedónan i turista for di afó, mientras ku tambe ta duna partisipantenan lokal sufisiente tempu pa prepará pa e kompetensianan.

E dia ofisial di registrashon pa kompetidónan lo tuma lugá dia 11 di òktober, sigui pa e promé dia di kompetensia dia 12 di òktober. Kompetensianan lo kontinuá dia 13 di òktober, mientras ku dia 14 di òktober ta reservá komo un dia di deskanso pa permití partisipantenan i bishitantenan disfrutá di aktividatnan adishonal i momentunan sosial. Kompetensianan lo reanundá dia 15 di òktober, pa yega na e kulminashon dia 16 di oktober.

E aña aki e regatta lo inkluí diferente disiplina di nabegashon manera Sunfish, Optimist, Yatenan, Microboat, Foiling i Windsurfing. E organisashon a enfatisá ku e gran variashon di kategoria tin komo meta uní diferente generashon i estilo di amante di deporte akuatiko den un solo selebrashon di kultura marítimo di Boneiru.

Aquaspeed a kompartí tambe nan vishon pa rebibá e ambiente kaluroso i vibrante di “bèk den tempu” ku a hasi Bonaire Regatta famoso den region Karibe. Sentral den e vishon aki ta kreá mas momentunan ameno i spesial unda partisipante, famia, bishitante i komunidat por reuní huntu na Kas di Regatta.

Aquaspeed ta enkargá ku e parti deportivo di Regatta, informashon tokante festival parti anochi no ta konosí ainda i lo keda organisá pa un otro organisashon. Entidat Públiko Boneiru lo bin ku mas infromashon tokante esaki mas despues.

Advertisement