Kompania agríkola Bon Tera a ekspresá preokupashon serio tokante futuro suministro di awa despues ku OLB a indiká ku kontrato di hür di plantashi di Onima Aloë ta keda terminá.

Segun propietario di Bon Tera, Arie Boers, e kompania ta risibí awa aktualmente for di un konekshon ku ta pasa via tereno di Onima Aloë. Un konekshon nobo e tempu ku nan a kuminsá na 2018 i halamentu di pipa pa konektá riba WEB lo a kosta Bon Tera mas ku 50.000 dòler, un suma ku no tabata posibel pa paga pa un negoshi den fase di start-up.

Boers a bisa ku Bon Tera no a risibí ningun indikashon ku nan mes lo mester bandoná e área, i ku nan ta spera di por sigui operá pa hopi aña mas. E negoshi ta dependé fuertemente di awa pa mantené su produkshon agríkola.

“Sin awa bo no por produsí. Nos tin 9 trahadó i esaki ta nos manera di gana nos pan di kada dia,” Boers a deklará.

Si tur kos sigui manera semper tabata, lono tin problema, pero sino lo ta hopi lamentabel si hasi operashon di Bon Tera imposibel pa motibu di awa. Boers a risibí bishita di OLB na su negoshi tokante e konekshon di awa pues ta algu ku nan ta tuma na serio el a indiká.

Segun Bon Tera, e uso di awa ta varia entre 300 i 500 metro kúbiko pa luna, ku parti di e suministro ta yega via e konekshon aktual ku ta riba plantashi Onima. E kompania ta señalá ku un sistema alternativo a base di trùk di awa lo no funshoná konsiderando nan nesesidat.

Boers a ekspresá preokupashon tokante e señal ku e situashon ta manda na kunukeronan. Segun e, si tereno di kunuku por wòrdu kita asina asina despues di añanan di invershon, esaki por krea inseguridat pa kunukeronan empresario ku kier invertí den produkshon lokal. El a indiká di ta paga su èrfpagt i huurgrond na òrdu i ta hasi loke ta wòrdu ferwagt di dje komo siudadano, pero si a kambio por yega kita tereno asina, esaki ta krea un problema. Si Gobièrnu ta ferwagt mas produkshon lokal, lokual ta pasando aki e orei ta kontra di nan propio maneho, Boers a deklará.

Bon Tera ta un kunuku lokal di bèrdura i yerba. E siguiente produktonan ta wòrdu kultivá: patia, snei bonchi, kònkòmber, rucola, kròpslá mesklá, menta, basil, spinazi, i vários tipo di mikro bèrdura. E bèrduranan ta keda bendé na Bon Tera riba djamars. Parti di e surtido di bèrdura tambe ta optenibel na supermerkadonan grandi na Boneiru.

Advertisement