Bonaire International Airport (BIA) a kuminsá trabounan di mantenshon riba su plataforma di widebody. E trabounan ta tuma lugá for di 23 te ku 28 di ougùstùs i ta inkluí e remplaso di e kapa superior di asfalt di henter e plataforma. E proyekto ta representá un invershon di aproksimadamente USD 1.4 mion.

Segun BIA, durante añanan kraaknan a forma den e asfalt na vários lugá komo resultado di e karga ku e plataforma ta risibí, prinsipalmente di avionnan pisá. E aeropuerto a indiká ku e kondishon tékniko di e plataforma ta wòrdu monitoriá kontinuamente i ku reparashonnan ta wòrdu realisá kaminda ta nesesario pa prevení mas daño i formashon di Foreign Object Debris (FOD).

Advertisement

BIA a informá ku den añanan resien e kantidat di reparashon di superfisie a oumentá gradualmente. P’esei a tuma e desishon pa renobá henter e kapa superior di asfalt. Segun e aeropuerto, esaki lo yuda garantisá kalidat i seguridat di e plataforma pa e próksimo añanan.

Pa limitá e impakto riba operashonnan diario, e trabounan ta keda ehekutá durante seis dia i anochi. BIA a konfirmá ku e aeropuerto lo keda kompletamente operashonal durante e periodo aki. Durante ehekushon di e trabounan, avionnan di widebody lo keda stashoná riba e plataforma dilanti di e terminal.

Ademas, BIA a indiká ku ta trahando riba plannan pa desaroyo i ekspanshon futuro di e área di plataforma di widebody. E plannan ta den fase final di preparashon i lo keda ehekutá den diferente fase durante próksimo añanan. Segun e aeropuerto, proyektonan di ekspanshon no ta kita e nesesidat pa trabounan di mantenshon aktual, teniendo kuenta ku e estado presente di e plataforma.