Tourism Corporation Bonaire (TCB) a publiká sifranan preliminar di turismo pa luna di sèptèmber 2026. Segun e datonan, Boneiru a risibí 12.758 bishitante stayover, un oumento di 4,6% kompará ku sèptèmber 2025, ora ku 12.196 bishitante a yega nos Isla.

Bishitantenan for di Hulanda a representá e grupo mas grandi, ku 6.234 bishitante (48,9% di e total). Merka a sigui ku 2.613 bishitante (20,4%), mientras ku Kòrsou a kontribuí ku 1.601 bishitante (12,5%).

Advertisement

Otro paisnan di orígen tabata Aruba ku 265 bishitante (2,1%), Alemania ku 259 (2%), Bélgika ku 243 (1,9%), Brazil ku 174 (1,4%), Argentina ku 166 (1,3%), Colombia ku 152 (1,2%) i Reino Uní ku 102 bishitante (0,8%).

Bishitantenan for di Merka

Segun TCB, sambuyamentu tabata e motibu prinsipal pa bishitantenan Merikano bishitá Boneiru, ku 48,1%. Fakansi tabata representá 40,5% i bishita di amigu i famia 1,6%.

En kuanto hospedáhe, 58,1% a keda den un hotèl, 11,3% den un vila, 6,8% den nan propio bibienda, 5,4% den un apartamento i 3,1% serka un miembro di famia.

E bishitantenan Merikano a bini prinsipalmente for di Florida, Texas, California, Georgia i North Carolina. E grupo di edat di 55 pa 64 aña a representá 27,2% di e bishitantenan, mientras ku esnan di 65 aña bai ariba a representá 19,4%.

Bishitantenan for di Hulanda

Entre bishitantenan hulandes, fakansi tabata e motibu prinsipal pa biaha, ku 69,7%. Bishitá amigu i famia a representá 9,3%, mientras ku biahe di negoshi a representá 7,8%.

Mayoria di e bishitantenan hulandes a hospedá den un hotèl (54,4%). Apartamentunan a representá 14,7%, estadia serka famia 10,1%, vilanan 4,3% i nan propio bibienda 3,8%.

E bishitantenan a bini prinsipalmente for di Zuid-Holland, Noord-Holland, Noord-Brabant, Gelderland i Utrecht. E grupo di edat di 55 pa 64 aña a representá 26,4% di e bishitantenan hulandes, sigui pa e grupo di 25 pa 34 aña, ku 23,8%.

E sifranan publiká pa TCB ta preliminar i ta duna un bista di e kantidat di bishitante stayover, nan pais di orígen, motibu di biahe, tipo di hospedáhe i distribushon di edat durante luna di sèptèmber 2026.