Pickleball ta sigui krese na Boneiru! Despues di un eksitoso aña 2025, hungadónan di nos isla ta preparando pa representá Bonaire den e próksimo Kopa Mundial di Pickleball 2026, ku lo tuma lugá na Da Nang, Vietnam.

E preparashonnan pa e evento aki ta den ful swing. Segun Paolo Allee, Presidente di Pickleball Association Bonaire, partisipashon na e evento aki ta un paso gigante pa pa Boneiru den e deporte aki, pero tambe un gran reto logístiko i finansiero.

E Kopa Mundial lo tuma lugá di 31 di ougùstùs te ku 6 di sèptèmber 2026, kaminda mas di 60 pais i alrededor di 5.000 hungadó lo den kompetensia super intensivo.

E kaminda pa Vietnam sinembargo ta largu i kostoso, i e selekshon tin mester di sosten, Gastunan ta rònt di $3.000 pa persona i e tim tin mester di mas spònser pa asina por kubri e gastunan aki i garantisá presensia di nos atletanan na e kompetensia mundial.

E nivel di Pickleball na Boneiru ta progresando rápidamente. Varios hungadó lokal ya kaba ta demostrá un nivel altu, djis un paso bou di e kategoria profeshonal, loke ta duna Bonaire bon chèns di kompetí di igual pa igual kontra e mihó nan di mundu.

Mas aleu Paolo a indika ku loke ta hasi Pickleball asina spesial ta ku e ta un deporte sumamente aksesibel pa tur edat. E kategoria di esnan ku mas di 50 aña ta un di esnan di mas grandi i aktivo, tantu na Merka komo aki na Bonaire, demostrando ku e pashon pa e deporte aki no tin límite.

Advertisement