Boneiru ta kore riesgo di desviá for di direkshon turístiko ku el a fiha pa su mes. Esaki ta segun BONHATA, ku den un komunikado di prensa a ekspresá su preokupashon tokante desaroyonan resien den e sektor turístiko i sifranan di yüni 2026.

Segun BONHATA, e Plan Maestro Stratégiko di Turismo 2017–2027 a skohe klaramente pa un modelo di turismo basá riba kalidat i no riba kantidat. E meta tabata pa atraé bishitantenan ku ta agregá mas balor ekonómiko na Boneiru, fortifiká e sektor di hotèl i sigui desaroyá e merkado norteamerikano.

E organisashon ta referí tambe na un estudio di impakto di Economisch Bureau Amsterdam (EBA) di 2025, den kua ta konkluí ku futuro kresementu ekonómiko di Boneiru no ta dependé prinsipalmente di mas kamber òf mas volúmen di bishitante, sino di okupashon mas haltu di hotèlnan eksistente, bishitantenan ku moda i un merkado norteamerikano mas fuerte.

Señalnan for di sektor

BONHATA ta indiká ku diferente negoshi den e kadena turístiko ta raportá un bahada den aktividat. Hotèlnan ta eksperensiá okupashon mas abou, restorantnan ta nota anochinan mas trankil, skolnan di buseo ta mira ménos kliente i agensianan di hür outo ta hür ménos vehíkulo. Tambe proveedónan di e industria di hospitalidat ta informá entradanan mas abou kompará ku aña pasa.

Segun e organisashon, partnernan internashonal di benta i distribushon ta raportá ku reservashonnan pa Boneiru ta atras ku mas o ménos 10% kompará ku e mesun periodo na 2025.

BONHATA ta argumentá ku ora señalnan for di diferente parti di e sektor ta mustra e mesun tendensia, ta importante pa evaluá no solamente e kantidat di bishitante ku ta yega Boneiru, sino tambe e kontribushon ekonómiko ku nan ta hasi.

Sifranan di yüni 2026

Datonan preleminar ta mustra ku Boneiru a risibí 13.387 bishitante di estadia na yüni 2026, un bahada di 1,6% kompará ku yüni 2025. E merkado merikano, konsiderá tradishonalmente komo un di e merkadonan ku ta aportá na e ekonomia lokal, a baha ku 12% te na 4.163 bishitante. E partisipashon di e merkado merikano den total di bishitante a kai di 35% pa 31%.

Na mes momentu, okupashon di hotèl a baha te na 51%, kompará ku 60% den yüni 2025. E tarifa promedio pa kamber (ADR) a subi levemente te na $252, miéntras ku e entrada pa kamber disponibel (RevPAR) a baha di $150 pa $128, un redukshon di 15%.

Pa e di dos kuartal di 2026, okupashon promedio tabata 57%, kompará ku 61% den e mesun periodo di 2025. ADR a subi te na $274, pero segun BONHATA e subida aki a kompensá solamente parsialmente e bahada den okupashon.

Reservashonnan futuro ta baha

BONHATA ta bisa ku e perspektivanan pa e restu di aña ta un motibu di preokupashon. Segun e organisashon, reservashonnan aktual pa novèmber 2026 ta 15% mas abou kompará ku novèmber 2025, miéntras ku reservashonnan pa desèmber ta keda atras ku kasi 10%.

Esaki, segun BONHATA, ta indiká ku e sektor por drenta e temporada haltu ku ménos reservashon ku den e mesun periodo di aña pasa.

Yamada pa un diskushon mas amplio

BONHATA ta enfatisá ku e sifranan ofisial di bishitante di estadia ta keda importante, pero no ta sufisiente pa evaluá kompletamente e prestashon ekonómiko di turismo.

P’esei, e organisashon ta hasi un yamada na gobièrnu, Tourism Corporation Bonaire (TCB) i otro partidonan enbolbí pa amplia e diskushon. Segun BONHATA, evaluashon di turismo mester inkluí faktornan manera gastunan di bishitante, durashon di estadia, tipo di akomodashon i merkado di orígen.

Ademas, BONHATA ta boga pa restablesimentu di konekshonnan aéreo norteamerikano, mas transparensia tokante e uso di impuesto di turista i un kolaborashon struktural ku TCB i gobièrnu riba merkadeo i datonan di merkado.

Advertisement