Kolegio di Supervishon Finansiero (Cft) a tuma e paso eksepshonal pa debolbé presupuesto den konsepto di Boneiru pa aña 2027, despues di konstatá ku e dokumento no ta kumpli ku eksigensianan legal básiko i no ta duna espasio pa un evaluashon adekuá pa e situashon finansiero di Boneiru.

Den su konseho formal na Bestuurscollege, Cft a indiká ku e presupuesto ta presentá defisiensianan serio ku ya a sali na kla den añanan anterior. Segun CFT, e problemanan no ta insidental, sino struktural, loke a kontribuí na e desishon pa no trata e presupuesto den su forma aktual.

Advertisement

Cft a pidi Boneiru pa revisá e dokumento kompletamente i presentá un vèrshon mehorá promé ku 28 di sèptèmber. E organisashon ta rekonosé ku esaki probablemente lo hasi ku e plaso legal pa entregá e presupuesto na Konseho Insular lo no keda alkansá.

Falta di splikashon pa gastunan i proyektonan grandi

Entre e kritikanan mas importante ta ku e presupuesto no ta duna sufisiente informashon tokante diferensia grandi den gastu i entrada kompará ku añanan anterior. Tambe falta un bista kla di e obligashonnan finansiero ku ya a keda asumí pa e gobièrnu.

Un ehèmpel ku Cft ta señalá ta e proyekto Selibon/Lagun. Segun CFT, e presupuesto no ta mustra kla kon gastunan ku por alkansá te USD 40 mion lo ser kubrí den e añanan benidero.

“E aktual presupuesto no ta duna sufisiente bista riba e amplitut ni obligashonnan ku ya ta eksistí,” segun evaluashon di Cft.

Invershonnan no ta elaborá sufisientemente

Cft a kritiká tambe e manera ku invershonnan ta keda presentá. E watchdog finansiero ta argumentá ku e presupuesto no ta spesifiká kla kon proyektonan lo ser finansiá ni kua lo ta e efekto di gastunan di mantenshon, depresiashon i operashon riba e presupuesto.

Segun Cft, esaki ta un problema ku ya a keda señalá repetidamente den evaluashonnan di presupuesto di añanan pasa, sin ku tin mehorashon sufisiente.

Preokupashon ku maneho finansiero

Segun Cft, e begroting pa 2027 no ta duna sufisiente informashon tokante desafionan i plananan pa mehora e maneho finansiero. E paragraaf di bedrijfsvoering ta menshoná solamente finalisashon di Handboek Financieel Beheer, mientras ku e trayekto aki ya a keda finalisá den 2026.

Cft ta konsidera ku, teniendo na kuenta e hopi desafio ku Boneiru tin den area di maneho finansiero, e informashon den epresupuesto no ta na e nivel ku a spera. Esaki ta limitá e informashon pa Konseho Insular, Cft i staatssecretaris di BZK tokante problema i solushonan planiá.

“No kier ripití situashon di 2026”

Cft a referí tambe na e proseso difísil di presupuesto 2026, ku a logra aprobashon na yanüari despues di hopi retraso i asistensia intensivo. E organisashon a indiká ku kier evitá un repetishon di e situashon aki.

A pesar di e kritika fuerte, Cft a rekonosé ku e aktual Kolegio Ehekutivo ta enfrentando problemanan ku a eksistí pa tempu largu, inkluyendo falta di disiplina presupuestario, debilidatnan den maneho finansiero i periodonan di instabilidat atministrativo.

Awor Boneiru tin te 28 di sèptèmber pa koregí defisiensianan señalá i presentá un presupuesto ku ta kumpli ku normanan legal i finansiero eksigí pa Cft.