Segun CFT, Boneiru no a realisá su presupuesto di 2026 segun loke a wòrdu planiá. Esaki ta sali for di e dos promé Rapòrtnan di Ehekushon (UR) i e di tres Kambio di Presupuesto (OBW) di 2026.

Realisashon di 35 porshento

Advertisement

• Entradanan a alkansá 35% di e presupuesto;
• Gastunan, inkluí obligashonnan, tambe a alkansá 35%;
• Sin konta obligashonnan, gastunan real ta solamente 25%.

Segun CFT, un motibu importante ta ku e presupuesto a keda hopi mas haltu durante e aña:

• Aproksimadamente USD 55 mion a ser agregá na asignashonnan spesial;
• Aproksimadamente USD 33 mion a ser agregá for di reservanan destiná.

CFT a indiká ku Boneiru ta mira e mesun problema kasi tur aña: no ta tur fondo presupuestá ta keda usá.

Entrada di impuesto

Entrada di impuesto a subi ku USD 1,2 mion, òf 5,5 porshento, kompará ku e di dos UR di 2025. E impuesto riba vehíkulonan a alkansá un realisashon di USD 6,4 mion, ku ta representá 103 porshento di e suma presupuestá. Pa impuesto di turista, e realisashon ta USD 8,9 mion, òf 60 porshento di e presupuesto.

Di tres kambio di presupuesto

Ku di tres OBW, e presupuesto ta keda oumentá saldoneutral ku USD 5 mion, pa alkansá un total di aproksimadamente USD 226 mion. E kambio ta inkluí oumentonan den entrada for di pèrmit pa loteria, limpiesa i impuesto riba vehíkulo. Segun OLB, e oumentonan ta basá riba realisashon di e aña anterior i proyekshonon pa 2026. Ademas, USD 2,8 mion ta wòrdu saká for di un reserva destiná pa finansiá mehorashon i mantenshon di e sistema di riol. OLB a risibí tambe USD 3,8 mion na asignashon spesial nobo.

Cft ta pidi mihó aliniashon entre presupuesto i ehekushon

Pa e siguiente kambio di presupuesto, Cft ta rekomendá pa OLB, basá riba e di tres UR, revisá e presupuesto i enfoká riba plannan ku realmente por wordu ehekutá den sobra di 2026.

Cft ta indiká ku fondo for di reservanan destiná kaminda no realistiko mas pa usa e aña aki por wordu reasigná pa otro nesesidatnan di finansamentu. Cft ta pidi tambe pa e rapòrtnan di ehekushonon duna mas informashon riba e gastu i entradanan ku ta wordu sperá den e kuaternan ku ta bini. Segun Cft, esaki lo permití un mihó evaluashon di desaroyo di presupuesto durante e aña.

Mehorashon di rapòrtnan i kòntròl interno

Cft ta bisa ku e ta satisfecho ku OLB a disidí pa hasi e klasifikashon segun kategorianan ekonómiko; inkluí splikashonnan ta un parti integral di e presupuesto i rapòrtnan. Segun Cft, informashon mas kompletu por yuda Kolegio Ehekutivo pa hasi ahustenan durante aña i tambe mehorá informashon disponibel pa Konseho Insular. Na mesun momento, Cft ta indiká ku ainda tin espasio pa mehorashon. Entre otro, tin kategoria kaminda e realisashon ta atrasá, sin ku tin un proyekshon kuantitativo kla pa e siguiente kwartalnan.

Cft a señalá tambe un korekshon di aproksimadamente USD 4,5 mion den e di tres OBW riba asignashonnan spesial. Segun e informashon, USD 3,4 mion tabata montantenan ku a keda registrá dos biaha, USD 0,9 mion ta relashoná ku loke a wòrdu gastá mas ku loke tabata permití den 2025, i USD 0,2 mion ta keda repartí riba diferente aña pa motibu di plannan nobo. Cft ta enfatisá den e konteksto aki e importansia di bon kòntròl interno pa prevení erornan den atministrashon i e presupuesto.

Planifikashon i kòntròl

Un otro punto ku Cft ta señalá ta e siklo di Planifikashon i Kontrol (P&C). E siklo ta wordu inkluí regularmente den e dokumentonan, pero segun Cft ainda no tin un aprobashon formal pa e Kolegio Ehekutivo. Cft ta rekomendá pa OLB, pa e presupuesto di 2027 i añanan ku ta bini, formalmente aprobá un siklo di P&C i koordiná esaki tambe ku Konseho Insular. Cft ta konsiderá un siklo formal importante pa garantisá un proseso di planifikashon i desishon ku ta ordená i na tempu.