Kolegio di Supervishon Finansiero (Cft) no por bisa si Boneiru lo logra mantené su presupuesto na ekilibrio den e añanan. benidero, basá riba e presupuesto pa 2027. Cft ta bisa ku algun gastu importante no ta inkluí bon den presupuesto i ku ainda no ta kla di unda e plaka pa paga diferente plan i proyekto lo bin.

Konseho di Cft, ku fecha 12 di òktober 2026, a yega Eilandsraad riba 21 di òktober. Den e dokumento, Cft ta menshoná ku ainda tin problema riba e manera ku a inkluí e gastunan pa Selibon/Lagun, alohamentu eskolar i Regio Deal. Tambe falta un lista kompleto di e reservanan di sèn ku gobièrnu a apartá pa diferente uso.

Advertisement

Segun Cft, no ta sufisiente pa un presupuesto mustra ku entrada i gastu ta igual. Mester tin tambe un bista kla di tur e gastunan ku gobièrnu mester paga, di unda e sèn lo bin i si realmente tin sufisiente plaka disponibel pa kumpli ku tur e kompromisonan.

Mionnan pa Selibon/Lagun no ta inkluí kompletamente

Un di e puntonan prinsipal di preokupashon ta e finansia­mentu di Selibon/Lagun. Segun e adendum na e akuerdo di gobernashon, pa 2027 i 2028 tin mester di un kontribushon adishonal na operashon di Selibon di USD 10,2 mion na total.

Den e konsepto di presupuesto pa 2027, solamente un oumento di USD 1 mion pa aña den e kontrato di servisio ta inkluí. E suma restante di USD 8,2 mion (USD 3,9 mion pa 2027 i USD 4,3 mion pa 2028), no ta prosesá den e kalkulashonnan.

Kolegio Ehekutivo kier warda riba presupuesto di Selibon promé ku determiná e nesesidat finansiero eksakto. Pero Cft ta konsiderá ku e akuerdonan eksistente ta duna sufisiente motibu pa tene kuenta ku e obligashonnan aki den futuro.

Ademas, Kolegio Ehekutivo ta menshoná USD 10,5 mion komo medio finansiero disponibel, sin splika kla di unda e suma aki ta bin. Entre e fuentenan di finansia­mentu menshoná tin USD 1,8 mion di asignashon spesial i USD 4,2 mion di ministerio di Infrastruktura i Maneho di Awa di Hulanda.

Sin un splikashon kla di kon lo kubri tur e gastunan, Cft no por determiná si e presupuesto ta realístikamente ekilibrá.

Situashon di likides ta trese preokupashon

Segun e pronóstiko di likides den e diseño di presupuesto, si e presupuesto ta Leda ehersé kompletamente, inkluyendo e invershonnan plania, e fondo propio likido di Boneiru lo baha te USD 4,9 mion na fin di 2027 i solamente USD 1,8 mion na fin di 2028.

Esaki ta un desaroyo preokupante. Un presupuesto por parse ekilibrá riba papel, pero si gobièrnu no tin sufisiente plaka disponibel pa paga su kuentanan i kumpli ku su obligashonnan, e problemanan finansiero por sigui.

Cft ta atvèrti ku ta nesesario tuma medida adishonal pa garantisá ku e kapasidat di resistensia finansiero di Boneiru ta realmente disponibel den forma di likides.

Onderwijhuisvestingr: reservashon no ta prosesá korektamente

Finansia­shon di edifisionan eskolar tambe ta lanta pregunta. Den e plan di invershon pa varios aña, ta reservá USD 2,4 mion pa aña durante sinku aña komo kontribushon propio di 30% pa proyektonan di alohamentu eskolar, den kuadro di e akuerdo ku e ministerio di Enseñansa, Kultura i Siensia di Hulanda.

Cft no por sigui bon kon e reservashon aki a wordu prosesá den e presupuesto finansiero. Un depósito den un reserva destiná tin influensia riba e resultado di presupuesto, pero e efekto aki no ta reflehá korektamente.

Ademas, den e presupuesto tin un gastu anual di USD 60.000 pa depresiashon di alohamentu eskolar. E suma aki ta parse ku ta basá riba un invershon di USD 2,4 mion ku ta depre­siá durante 40 aña. Esaki ta lanta duda si e invershon ya a tuma lugá òf si e ta plania pa futuro.

Cft ta eksigí un prosesamentu korekto pa konsekuensianan finansiero di e plan.

Regio Deal: kontribushonnan propio di mion no ta den presupuesto

Regio Deal ta forma un otro riesgo finansiero. Den e presupuesto di maneho, Boneiru ta menshoná un kontribushon propio di USD 11 mion. Sin embargo, segun Cft, e presupuesto finansiero no ta mustra ku e kontribushon aki ta inkluí ku sifra kla.

Pa transporte públiko tin USD 4,1 mion disponibel, di kua USD 2 mion ta bini di fondo propio di Boneiru, segun e splikashon den presupuesto di maneho.

Pa otro proyektonan bou di e Regio Deal, Boneiru a risibí USD 21,4 mion, pero e kontribushon propio restante di USD 9 mion ainda no ta inkluí den e presupuesto finansiero.

Kolegio Ehekutivo kier inkluí e sumanan ora e proyektonan kuminsá. Cft ta konsiderá ku, teniendo na kuenta e limitashon di likides, Boneiru mester duna un bista finansiero mas kompleto adelantá.

E pregunta no ta solamente si Boneiru kier ehersé e proyektonan, sino tambe si e por paga su parti sin pone mas preshon riba su situashon finansiero.

Reservanan destiná: bista no ta kompleto

Segun e estado di reserva i provishon, Boneiru tin un saldo total di USD 57,6 mion den reservanan destiná. Di e suma aki, USD 56 mion ta den reserva pa depresiashon i partisipashonnan.

Cft ta señalá ku diferente reservashon i movemento finansiero no ta kla den e dokumentonan. Esaki ta inkluí fondo pa maneho sostenibel di desecho, mantenementu di infrastruktura, invershonnan plania i areglo pa personal mayor.

Tambe falta e reserva di USD 5,1 mion pa invershon den Selibon, ku a wordu forma durante e di dos kambio di presupuesto di 2026. E reserva pa alohamentu eskolar tambe no ta presente.

Cft ta eksigí un lista kompleto di tur reserva, fondo i provishon, inkluyendo e depósito i retiro plania pa periodo 2027-2030.

Sin un bista kompleto, ta difísil pa determiná kua fondo ta realmente disponibel i kua fondo ya ta reservá pa un destinashon spesífiko.

Mehorashon di maneho finansiero ainda ta falta di konkretisashon

Cft ta rekonosé ku Kolegio Ehekutivo a anunsiá diferente medida pa mehorá maneho finansiero. Entre otro, tin e intenshon pa pone kontroladónan finansiero i konseheronan di maneho den kada direkshon, introdusí un kalènder di planifikashon i kontrol pa 2027, i kontratá eksperto eksterno pa mehorá proseso finansiero.

Sin embargo, Cft ta keda kritiko. E medida­nan no tin término kla ni resultado ku por midi. P’esei, e propuesto ta keda demasiado liber i sin sufisiente garantia ku nan lo wordu ehersé.

Cft ke reuni ku Kolegio Ehekutivo pa papia tokante e planifikashon i e progreso di e medida­nan.

E Presupuesto no ta balansá

Entrada i gastu total di Boneiru pa 2027 ta kalkulá na USD 153,2 mion, pero un resultado di presupuesto riba zero no ta garantisá ku e situashon finansiero ta sostenibel den futuro.

Cft ta señalá ku tin obligashonnan finansiero ku no ta inkluí kompletamente, entre otro pa Selibon/Lagun, alohamentu eskolar i Regio Deal. Tambe tin preokupashon tokante likides i reservanan destiná.

Cft ta konkluí ku, ku e presupuesto aktual, no por determiná si Boneiru lo kumpli ku e norma di ekilibrio di presupuesto durante añanan benidero.

Kolegio Ehekutivo mester duna mas klaridat tokante gastunan, fuentenan di finansia­mentu i e plaka realmente disponibel. Eilandsraad, na su turno, mester evaluá sifra i e riesgonan ku atenshon durante tratamentu di presupuesto.