Federashon di Futbòl di Boneiru (FFB) a risibí un delegashon di CONCACAF pa un bishita di trabou enfoká riba e situashon aktual di futbòl na Boneiru, e kondishonnan nesesario pa reinisiá futbòl organisá, i e próksimo pasonan pa fortalesé maneho i struktura institushonal di FFB.

E delegashon di CONCACAF tabata konsistí di Howard McIntosh i Sofia Malizia, di e Divishon di Asosiashonnan Miembro di CONCACAF.

Advertisement

Durante e bishita, CONCACAF i FFB a tene reunion ku diferente stakeholder importante den komunidat di futbòl i ku representantenan di klupnan. Segun FFB, e reunionnan a duna stakeholdernan e oportunidat pa kompartí nan punto di bista, identifiká retonan ku futbòl na Boneiru ta enfrentá aktualmente, i diskutí pasonan práktiko pa restablesé aktividatnan di futbòl di un manera responsabel, sostenibel i organisá.

FFB a informá ku presidente di e federashon a deskribí e reunionnan komo produktivo i konstruktivo. Segun e federashon, e diskushonnan a permití ku diferente stakeholder por a ekspresá nan punto di bista i kontribuí na identifiká un direkshon komun pa futbòl na Boneiru. FFB a agregá ku e representantenan di CONCACAF a ekspresá satisfakshon ku nan a por reuní ku miembronan di komunidat di futbòl na Boneiru i tende direktamente nan preokupashonnan.

Despues di diskushonnan, a desaroyá un plan di akshon riba termino kòrtiku. Segun FFB, e plan ta identifiká medidanan konkreto pa hasi posibel e reinisio di aktividatnan di futbòl i ta indiká e próksimo pasonan nesesario pa fortalesé struktura organisatorio i di maneho di e federashon.

FFB ta informá ku e plan di akshon ta un ruta pa restablesé un struktura di maneho stabíl, ku tin komo meta pa tene elekshonnan nobo di FFB no mas lat ku febrüari 2027.

Den su komunikado, FFB a indiká ku e ta rekonosé su responsabilidat pa hiba e proseso dilanti i ku progreso signifikativo lo rekerí koperashon, kompromiso i konfiansa entre tur stakeholder. E federashon a ekspresa apresio pa sosten i guia kontinuo di CONCACAF i a hasi un yamada na e klupnan i komunidat di futbòl pa kontribuí di un manera konstruktivo na e implementashon di e akshonnan identifiká.

FFB a indiká ku den e periodo ku ta bini lo duna mas informashon tokante e implementashon di e plan di akshon, e reinisio di futbòl i e trayekto pa fortalesé maneho di e federashon.