Entrante 1 di yanüari 2027, trahadónan na Boneiru, Sint Eustatius i Saba ku pèrdè nan trabou sin ku esaki ta nan kulpa por apliká pa un benefisio temporal di desempleo. E areglo nobo ta brinda sosten finansiero pa un máksimo di tres luna, miéntras ku ta traha na un lei permanente pa benefisio di desempleo na Hulanda Karibense.

E areglo temporal di benefisio di desempleo BES a wordu publiká den Staatscourant dia 8 di yüli 2026. E ta na vigor te ku 31 di desèmber 2031, pa mas tardá. Segun Rijksdienst Caribisch Nederland (RCN), e eksperensianan ku ta optené durante e periodo aki lo kontribuí na desaroyo di e legislashon permanente. 

Advertisement

Ken por bini na remarke?

E areglo ta destiná pa trahadónan ku ta traha na un di e tres islanan BES, ta risibí salario di un dunadó di trabou i bira desempleá inboluntariamente.

Pa bini na remarke, un trahadó mester a traha por lo ménos 26 siman durante e 10 lunanan promé ku e pèrdida di trabou, ku por lo ménos un ora di trabou pa siman. Simannan ku ferlòf pagá, malesa ku salario òf benefisio di malesa, ferlòf pa kuido i ferlòf pa kalamidat tambe por konta pa e rekisito di siman di trabou.

Kuantu e benefisio ta kubri?

Segun e kriterianan publiká pa RCN, e benefisio ta 75% di e salario promedio di e trahadó durante e seis lunanan promé ku el a bira desempleá. Otro entrada di trabou tambe por wòrdu tumá na kuenta den e kalkulashon.

E benefisio por wòrdu risibí pa un periodo máksimo di tres luna, bou di e kondishonnan stipulá den e areglo.

E areglo temporal ta forma un paso intermedio pa trahadónan ku bira desempleá inboluntariamente, mientras ku gobièrnu ta sigui traha na un sistema permanente di benefisio di desempleo pa Hulanda Karibense.