Awe, 6 di sèptèmber 2026, Boneiru ta selebrá Dia di Boneiru i, ku selebrashon di e aña aki, tambe ta marka 40 aña di su Eskudo ofisial. E eskudo ta un di e tres símbolonan ofisial di Boneiru, banda di bandera i himno. E lema di e selebrashon di e aña aki ta “Protehando nos isla”. 

E eskudo ku nos konosé awe a surgi despues di un proseso largu di búskeda pa un símbolo propio pa Boneiru. Promé ku 1986, diferente diseño a keda proponé, pero no a haña aprobashon. Un di e diseñonan tabata esun di Frans Booi, ku a purba pa trese historia, presente i futuro di Boneiru huntu den ún eskudo. 

Advertisement

Den su diseño, Booi a pone varios símbolo ku ta konektá ku e isla i su historia: e solo, barku, flamingo, chubatu i karkó. E elementonan aki tabata referí na e pasado di Boneiru i na e konekshon profundo entre e pueblo i su entorno.

Sentral den e diseño tabata e idea di “Ecuanimidad”, òf ekilibrio di espíritu. Den sabiduria popular, Booi a haña un ekspreshon ku tabata resumí e pensamentu bon: “Biba i laga biba.”

E frase ta reflehá un idea di igualdat, hospitalidat i un komunidat kaminda hende, animal i naturalesa por eksistí banda di otro ku rèspèt mutuo.

Finalmente, dia 26 di yüni 1986, Konseho Insular a presentá e eskudo di Boneiru. E diseño ta inkluí, entre otro, un timon di oro, un strea kòrá, un renchi di kompas pretu i un korona di oro. E timon ta referí na e konekshon di bonerianonan ku laman i na e tradishon di nabegashon di e isla. 

E aña aki, ku Boneiru ta marka 40 aña di e eskudo, e selebrashon ta duna un oportunidat pa no solamente wak bèk riba nos historia, pero tambe pa pensa riba loke nos kier protehá pa e generashonnan ku ta bin: nos isla, nos naturalesa, nos idioma, nos kultura i, prinsipalmente, nos komunidat. 

Dia di Boneiru ta un momento pa selebrá ken nos ta i e 40 aña di nos Eskudo ta un rekordatorio di e proseso largu ku a yega na un símbolo ku awe ta parti di nos identidat.