Desishon di Kolegio Ehekutivo pa muda festival di Regatta 2026 for di parkerplaats di BC a proboká un diskushon den Reunion di Konseho Insular 1 di sèptèmber 2026. Vários konsehal a ekspresá nan preokupashon fuerte tokante seguridat, maneho di multitut i falta di transparensia tras di e kambio.

Gezaghèber John Soliano a aklará ku evaluashonnan di riesgo relashoná ku permit di evento a indiká ku parkerplaats di BC no ta adekuá mas pa e kantidat di hende ku Regatta ta atraé. Tempu ku Regatta akuminsá 59 aña pasa tabatin alrededor di 14 mil hende bibá na Boneiru, pero awor tin kasi 29 mil persona. Den kaso di emergensia, e area tin limitashon serio pa evakuá hende, miéntras ku Centrumgebied tin mas salida i ruta di evakuashon. Kolegio Ehekutivo a formalisá e desishon aki dia 26 di ougùstùs basá riba konseho di servisio di seguridat, inkluyendo polis i kuerpo di bombero. Tourism Corporation Bonaire lo ta e organisashon enkargá pa organisa Regatta 2026.

Advertisement

Algun miembro di Konseho Insular no ta satisfecho i a indiká ku centrumgebied ta parse mas chikí i mas peligroso ku e parkerplaats di BC.

• Konsehal Benito Dirksz a kuestioná pakiko un sitio ku a funshoná pa 59 aña sin insidente mayor awor diripiente ta wòrdu konsiderá insigur, atvirtiendo ku un kalamidat den sentro por bira muchu mas kompliká.
• Konsehal Rolanda Hellburg-Makaai a enfatisá ku mudansa aki ta pone e tradishon kultural aki bou di preshon i a hasi un yamada direkto na Gezaghèber pa re evaluá e desishon.
• Konsehal Yona Chirino-Felida a sugerí ku mester enfoká mas riba mehorá e kumplimentu di instrukshonnan i maneho di aglomerashon na lugá di move e evento for di e sitio habitual.
• Konsehal James Kroon a pidi pa e konseho haña akseso inmediato na tur e rapòrtnan di evaluashon di riesgo i tambe indikando ku  proyektonan di konstrukshon den Kaya Grandi i hanchi di Subway no lo ta kla.

Faltando ménos ku sinku siman pa inisio di Regatta 2026, miembronan di Konseho Insular ta sigui preshoná pa haña e dokumentashon kompleto i pa re evaluá e desishon definitivo.