Fundashon ECHO, bou di liderato di direktora Julianka Clarenda, a ekspresá sorpresa ku e komunikado resien di Entidat Públiko Boneiru ku ta instruí habitantenan i bishitantenan pa no duna lora salbahe kuminda. Segun e organisashon, durante mas ku 16 aña nan a traha pa protehá i fortalesé e poblashon di lora na Boneiru, ku enfoke riba restourashon di habitat i ko-eksistensia entre hende i fauna salbahe.

ECHO ta indiká ku un di su tarea prinsipal ta reforestashon, ku e meta pa oumentá e kantidat di palunan ku ta produsí fruta i otro fuente natural di kuminda pa loranan den nan habitat. Ademas, tur luna na yanüari, e fundashon ta organisá konteo pa monitoreá poblashon di lora, lokalisá nan área di biba i sigui desaroyo di nan lugánan di reprodukshon.

Segun ECHO, e datonan ku nan a rekolektá ta indiká ku e poblashon di lora na Boneiru ta stabil. E organisashon ta bisa ku semper a defendé un manera di biba den harmonia ku e loranan, rekonosiendo ku e paranan ta bishitá área habitá pa hende den buska di kuminda durante temporada di sekura.

E fundashon ta opiná ku lo tabata preferibel si gobièrnu tabata den konsultá ku organisashonnan eksperto den konservashon promé ku publiká e komunikado. “Ta un sorpresa ku un gobièrnu ta bisa pa no yuda un espesie endémiko i salbahe di Boneiru ku, segun nos eksperensia, ainda tin mester di sosten,” ECHO ta señalá.

Un otro punto ku ECHO ta konsiderá importante ta e referensia na legislashon. Segun e fundashon, e leinan aktual ta protehá lora kontra kaptura, komèrsio ilegal, molester i destrukshon di nèshi, pero nan ta puntra si tin algun base legal spesífiko ku prohibí alimentashon di lora salbahe. E organisashon ta bisa ku lo ta útil pa publiká e artíkulonan relevante di lei òf e konsehonan tékniko i sientífiko riba kua e komunikado ta basá.

ECHO ta agregá ku tin manera di ofresé kuminda na un forma kontrolá i sigur, manera di pone kalbas òf otro fuente natural di alimentashon den lugánan adekuá pa loranan por kome sin riesgo. Segun e fundashon, e diskushon no mester ta si hende mester òf no mester yuda lora, sino kon pa hasi esaki di un manera ku ta kontribuí na bienestar i seguridat di e poblashon.

E organisashon ta enfatisá ku su meta prinsipal ta pa garantisá ku lora di Boneiru keda salú, sigur i ku un poblashon stabil pa generashonnan futuro.

E loro di skouder hel (Amazona barbadensis), òf “lora” manera ku ta konosí lokal mente na Papiamentu, ta konsiderá komo un spesie vulnerabel ku ta enfrentá peliger di ekstenshon. Tin aproksimadamente 1000 lora na Boneiru. Tambe tin populashonnan na e kosta di Venezuela i riba e islanan La Blanquilla i Margarita. Histórikamente, e loranan tabata presente na Aruba, pero nan a bira ekstinto aya den añanan 1940. Boneiru ta kas di e úniko populashon nativo ku a keda pafó di Venezuela.

E populashon di lora na Boneiru ta enfrentá vários menasa, manera hòrtamentu di nan nèshi pa komèrsio, i tambe pèrdida i degradashon di nan habitat natural. Nan yunan ta keda saká for di nan nèshinan i bendé den e komèrsio ilegal di lora komo bestia di kas. E aktividat aki por daña nèshinan i redusí oportunidat pa reprodukshon. Boneiru ainda no a rekuperá kompletamente for di desforestashon di palunan ku a tuma lugá prinsipalmente na prinsipio di siglo 19. Maske gran parti di e isla ta kubrí ku mondi, kabritu i buriku invasívo ta daña òf destruí vegetashon nativo, loke ta afektá e biodiversidat di mata i palu. Ademas, desaroyo komersial i residensial ta sigui pone preshon riba e habitat natural di e loranan.

Fundashon ECHO Boneiru

Echo Foundation Boneiru ta un organisashon sin meta lukrativo fundá na 2010. E organisashon su trabou ta pa protehá e lora i pa apoyá e restorashon di e habitat di mondi seku di Boneiru. Nan ta operá for di sentro di konservashon Kunuku Dos Pos.

Nan aktividatnan prinsipal ta inkluí:

• Protekshon di spesie: Vigila kiebro di neshi di lora i organisá un konteo anual di lora na Boneiru;
• Reforestashon i restourashon di habitat: Planta palunan nativo i manehá e impakto di spesienan invasívo manera kabritu i buriku;
• Kwekerij di mata: Operá un kwekerij na Dos Pos unda mata lokal i otro produkto ta wòrdu bendé pa sostené proyektonan ambiental i edukativo;
• Edukashon i boluntariado: Organisá programanan edukativo, evento boluntario i proyektonan di konservashon ku partisipashon di komunidat.

E trabou di Fundashon Echo Boneiru ta kontribuí na e konservashon i protekshon di lora i tambe na restourashon di medio ambiente na Boneiru.

Advertisement