Elfried Francisco Jozephia, Lilian Paula-Crestian i Cliff Bruno Frans a keda nombrá komo Siudadanonan di Honor di Boneiru durante e seremonia protokolar di Dia di Boneiru 2026.

Entidat Públiko Boneiru a anunsiá e nombramentu di e tres persona, kende a kontribuí durante hopi aña na komunidat boneriano den diferente área.

Advertisement

Elfried Francisco Jozephia

Elfried Francisco Jozephia a dediká mas ku 15 aña na trabou ku mucha i hóben, prinsipalmente pa medio di karate.

Ademas di karate, Jozephia a yuda hóbennan ku struktura, disiplina i desaroyo personal. E tabata buska mucha na kas pa hiba nan na entrenamiento i trese nan kas despues.

Jozephia a organisá kompetensianan i a yuda ku paña di karate pa mucha di famia ku ménos posibilidat finansiero. E trabou aki el a hasi sin pidi kompensashon.

Lilian Paula-Crestian a traha durante mas ku 36 aña den diferente área ku ta relashoná ku enseñansa i komunidat.

Su eksperensia ta inkluí trabou komo dosente di Papiamentu, koordinadó di èksámen i mèntòr di hóbennan. Banda di su trabou profeshonal, el a partisipá durante hopi aña den trabou boluntario pa komunidat.

Su trabou a enfoká, entre otro, riba enseñansa, desaroyo di hóben, Papiamentu i trabou sosial.

Cliff Bruno Frans a dediká mas ku 16 aña na dokumentashon i cobertura di diferente akontesimentu na Boneiru.

Pa medio di Big Papa, Frans a dokumentá eventonan kultural, notisia i desaroyonan na Boneiru. E materialnan tambe a yuda bonerianonan ku ta biba pafó di Boneiru pa keda konektá ku loke ta pasa riba isla.

Frans tambe a traha riba dokumentashon di patrimonio boneriano, entre otro huntu ku Bòi Antoin. E trabou ta inkluí dokumentashon di storia, imágen i otro komponentenan di patrimonio kultural. Na e okashon Cliff Bruno Mars no tabata presenté i tabata na selebrashon di Dia di Boneiru na Hulanda, un representante a risibí e honor pe na Boneiru.