Energia TV a presentá un protesta formal i urgente na Sekshon di Kultura, Arte i Literatura (SKAL) di Entidat Públiko Boneiru, despues di desishon pa duna un kanal di Kòrosu akseso na livefeed pa transmishon bibu di Regatta Festival 2026.

Den un karta dirigí na diputado Timoteo Silberie i Ruthmila Sint Jago, direktor di SKAL, ku Konseho Insular di Boneiru den kopia, nos a pidi pa suspendé temporalmente akseso na Livefeed pa aktividatnan di, 17 di òktober na kanal di Kòrsou, te ora e situashon keda klarifiká. Pa nos, e situashon aki ta lanta pregunta importante tokante transparensia, trato hustu i falta di un maneho kla pa protehá prensa lokal na Boneiru.

Advertisement

Den mundu di deporte i entretenimiento, ta komún pa organisadónan duna akreditashon òf derechi di transmishon pa un área geográfiko spesífiko. Un ehèmpel ta Miss Universe, kaminda derechi di transmishon ta keda asigná na diferente región. E sistema aki ta permití ku un kanal òf un organisashon ta invertí den e produkshon, ku sierto seguridat ku e derechonan ku a wordu otorgá lo wordu respetá.

Den e kaso di Regatta, e preokupashon ta ku, miéntras dos kanal di Boneiru ta invertí den produkshon i transmishon di e evento, e organisashon ta opta pa un kanal di Kòrsou por haña akseso pa transmití e mesun kontenido. E medionan di Boneiru no ta opera solamente pa un públiko lokal; nan tin akseso regional via Flow i Digicel na Kòrsou, i tambe via SETAR na Aruba. Ademas, Energia TV ta aksesibel den diferente parti di Karibe, inkluyendo Sint Maarten, Sint Eustatius, Guyana i Trinidad, i tambe na Hulanda. Enrgia TV tabata bibu riba Facebook, Amazon Stick, IPTV, energiabonaire.com pa henter mundu.

Ku e alkanse aki i infrastruktura ku ya ta eksistí, ta importante pa evaluá ku kuidosamente si tin nesesidat pa krea un situashon kaminda un kanal di pafó ta kompetí direktamente den transmishon di un evento kultural di Boneiru.

Dikon Boneiru lo krea kompetensia den su propio eventonan kultural, ora ku medionan lokal ya tin e kapasidat i infrastruktura pa transmití na nivel regional?

Kolaborashon entre islanan por ta benefisioso, pero e no mester bai na kosto di sosten i desaroyo di e sektor di media lokal. Protehá e invershon di e medionan di Boneiru ta tambe invertí den trabou lokal, talento profeshonal i kapasidat di e isla pa sigui produsí i transmití su propio eventonan pa henter region.

Reunion promé ku anochi final di Regatta

Promé ku e anochi final di Regatta Festival, nos a reuní ku direktor di SKAL Sra. Ruthmila Sint Jago i diputado Timoteo Silberie pa diskutí diferente preokupashon i reto ku nos, huntu ku otro profeshonalnan di media lokal, ta enfrentá.

Durante e reunion, nos a presentá nos preokupashonnan i a pidi pa tuma nan na konsiderashon. Segun loke a wordu indiká durante e reunion, diputado Silberie mester a risibí konseho promé ku e por tuma un desishon balansa riba nos petishon.

Identidat kultural ta kuminsá na kas

Kada isla tin su propio identidat, tradishon i momentunan kultural ku ta forma parti di su historia i orguyo di su pueblo. Pa e motibu ei, ta importante pa e medionan di komunikashon di kada isla tin un ròl sentral den dokumentá, produsí i transmití eventonan kultural ku ta representá nan komunidat.

Un ehèmpel ta selebrashon di Dia di Betico Croes na Aruba, kaminda ta natural pa medionan lokal di Aruba hunga un ròl importante den transmishon di e evento. Na Kòrsou, Dia di Himno i Bandera, Festival di Tumba i otro manifestashonnan kultural ta forma parti di e identidat di e isla, i ta di gran balor pa medionan di Kòrsou dokumentá i transmití nan. Di mesun manera, Regatta i Dia di Rincon ta evento ku ta reflehá historia, kultura i identidat di Boneiru.

Un di e puntonan ku ta meresé atenshon ta ku Boneiru ya tin medionan di komunikashon i infrastruktura ku ta realisá produkshon i transmishon di evento grandi ku ta yega Kòrsou i Aruba. Si e kapasidat aki ta disponibel, ta rasonabel pa hasi e pregunta, dikon no protehá esaki?

Protekshon di prensa lokal ta esensial

Nos a enfatisá ku protekshon di prensa lokal no mester ta solamente un tema ku ta surgi ora tin desakuerdo tokante un evento. Nos mester tin un maneho struktural ku ta sostené desaroyo di medionan lokal i ta definí klaramente e reglanan pa akseso na evento públiko.

Boneiru tin kapasidat tékniko, eksperensia i posibilidatnan di distribushon pa promové kultura i eventonan di nos isla na nivel lokal, regional i internashonal. Nos ta invertí den ekipamentu, personal i infrastruktura pa kubri evento di Boneiru i hiba imágen di nos kultura pa públiko lokal i internashonal. P’esei, nos ta konsiderá ku desishonnan tokante livefeed i derechonan di transmishon mester tuma na konsiderashon e invershon i sostenibilidat di e sektor.

Regatta Festival ta un evento ku ta risibí sosten finansiero públiko. P’esei, nos ta kere ku e organisashon tin un responsabilidat pa garantisá transparensia i trato hustu ora ta otorgá oportunidatnan pa transmishon.

Diferensia entre raportá notisia i transmití bibu

Nos ta distinguí entre derecho di prensa pa kubri un evento komo notisia i derecho pa transmití e evento kompletu bibu.

Prensa di pafó mester por hasi entrevista, publiká potrèt, produsí reportahe i informá nan públiko tokante Regatta. Sinembargo, transmishon bibu integral i uso di un señal ofisial mester ta a base di akreditashon, kontrato i derechonan di transmishon.

E diferensia aki ta importante. Nos no ta pidi pa prohibí prensa di pafó di kubri Regatta. Nos ta pidi pa definí regla kla pa transmishon bibu i pa duna medionan lokal un oportunidat hustu pa kontribuí na e kobertura audiovisual di e festival di nan propio isla.

Nos a pidi SKAL pa splika kua kriterianan a usa pa duna Direct Live 13 risibí akseso na livefeed i kon e dos stashonnan di televishon di Boneiru a wordu konsiderá den e proseso. Segun nos kombersashon Massive Productions a duna Direct Live 13 e outorisashon pero no ta kla bou di kua kriterio i si e organisashon ta esnan kompetente pa duna outrisashon na medio nan di prensa di afo pa trasnmití.

Ehèmpelnan internashonal: kon otro evento ta regulá transmishon

Na diferente pais, organisadónan ta distinguí entre akreditashon periodístiko i derechonan pa transmití un evento kompleto. E ehèmpelnan aki ta mustra ku ta posibel pa definí regla pa transmishon sin kita e posibilidat pa prensa hasi reportahe.

Brasil — Carnaval di Rio de Janeiro

E organisashon ku ta representá skolnan di samba na Rio, tin regla pa akreditashon i transmishon di e desfile di Carnaval. Akseso komo prensa no ta nifiká outomatikamente ku un medio por transmití e desfile kompleto sin outorisashon.

Trinidad i Tobago — Karnaval

National Carnival Commission di Trinidad & Tobago ta usa un sistema di akreditashon pa prensa. E derechonan pa transmití presentashon kompleto por dependé di outorisashon i di kondishonnan ku e organisashon ta establesé.

Aruba — Karnaval

Na Aruba, e sistema di transmishon di Carnaval pa medio di plataforma di pago ta un ehèmpel di kon derechonan di señal ofisial por wordu definí. E kondishonnan publiká pa Carnaval 2026 ta referí na derechonan di transmishon relashoná ku Stichting Maneho di Aruba su Carnaval (SMAC) i Stichting Musica.

Kòrsou — Karnaval i festival di músika

Na Kòrsou, Fundashon Desaroyo Karnaval Kòrsou tin un proseso di akreditashon pa medionan ku ke kubri aktividatnan di Karnaval. Curaçao North Sea Jazz Festival tambe ta usa akreditashon pa periodista i fotografo, ku regla pa akseso na e tereno i na sierto espasio di prensa, no por transmití bibu. Festival di tumba tambe tin akreditashon pa prensa pero no ta permití pa transmití bibu.

E ehèmpelnan aki no ta nifiká ku Aruba òf Kòrsou tin un prohibishon general pa prensa estranhero di kubri evento kultural. Nan ta mustra ku organisadónan por definí regla pa akreditashon, akseso. Nos ta kere ku Boneiru tambe mester tin un maneho kla, ku ta tene kuenta ku e nesesidatnan di su propio sektor di media.

Preparashon pa 60 aña di Regatta na 2027

Den nos enkuentro nos a kana ront den e area promé ku e evento a start pa duna un mihó bista na diputado Silberie. Nos a konsiderá ku e deskontentu ku tin entre fotografo- i videografo i prensa lokal ta hasi nesesario pa evaluá e situashon riba término kortiku. Diputado Silberie ta mira e nesesidat pa kuminsá preparashon i krea kuadronan pa e selebrashon di 60 aña di Regatta na 2027, ku atenshon pa e kobertura audiovisual i ròl di medionan i profeshonalnan lokal.

E preparashon mester inkluí diálogo entre organisadónan, medionan, fotografo i videografo, pa definí e reglanan i responsabilidatnan di kada partido promé ku e siguiente edishon di e festival. Nos ta kere ku un maneho kla por prevení malkontentu, fortalesé koperashon i duna mas seguridat na profeshonalnan ku ta invertí den kobertura di evento di Boneiru.

Energia TV ta pidi transparensia i trato hustu

Pa nos di Energia TV, e debate aki ta bai mas leu ku un desishon individual tokante otro medionan. E ta trata kon Boneiru por fortalesé su propio sektor di media, mientras ku e ta sigui habrí pa koperashon ku prensa di pafó.

Nos no ta pidi eksklushividat pa nos mes, pa eventonan kultural finansiá ku fondo públiko nos ta kere ku NO por eksisiti eksklusividat entre medianan Boneriano lokal. Nos ta pidi un sistema ku ta kla, transparente i hustu pa tur medio, ku ta protehá e invershon den media lokal i ta duna nos e oportunidat pa sigui kontribuí na promoshon di kultura i identidat di nos isla.

Protekshon di prensa lokal ta esensial. Un evento ku ta representá kultura, identidat i orguyo di Boneiru mester kontribuí na desaroyo di e medionan ku ta dokumentá i promové e kultura ei. Ku preparashon pa 60 aña di Regatta na 2027, nos tin un oportunidat pa traha huntu riba un maneho mas transparente i sostenibel pa e futuro di prensa lokal na Boneiru.