Entidat Públiko Boneiru (OLB), den un kolaborashon ku Hulanda, a lansa un proyekto piloto nobo ku tin komo ophetivo pa brinda sosten finansiero na doñonan di kas monumental ku tin mester di mantenshon.

E proyekto aki ta un paso fundamental pa konservá e patrimonio kultural i históriko di nos isla, enfokando riba kasnan ku ta rekerí atenshon i restourashon urgente. E periodo pa entrega di solisitut ta habrí di 1 te ku 30 di sèptèmber di e aña aki. Durante e luna aki, petishonnan entregá lo wòrdu evaluá abase di un rapòrt di evaluashon tékniko pa determiná e nesesidat pa supsidio i ayudo adishonal.

Advertisement

Herson Martinus, Sekretario di direktorado di Planifikashon i Desaroyo, a duna mas detaye tokante kriterionan pa yega na remarke i sosten ku doñonan di kas por risibí:

• E kas ku ta bini na konsiderashon mester tin mas ku 50 aña di eksistensia i un balor kultural i históriko probá;
• E kas monumental mester ta aktualmente den uso;
• E supsidio por kubri te un máksimo di $5.000 pa e evaluashon tékniko nesesario;
• Pa fasilitá e proseso i kubri e promé gastunan mesora, doñonan por risibí un adelanto di $2.500.

Doñonan di propiedat ku ta kumpli ku e rekisitonan aki ta keda kordialmente invitá pa entregá nan solisitut promé ku 30 di sèptèmber 2026 pa bini na remarke pa e fasilidat i ayudo aki.