Entidat Públiko Boneiru ta pidi habitantenan i empresarionan pa entregá petishonnan pa pèrmit i notifikashonnan pa eventonan, presentashonnan musikal i aktividatnan ku vürwèrk ku ta tuma lugá entre 11 di desèmber 2026 i 10 di yanüari 2027.

E fecha límite pa entregá petishonnan ta 6 di novèmber 2026. E yamada ta apliká pa pèrmit di evento, pèrmit di büfèt i pèrmitnan nesesario pa benta di vürwèrk riba kaya. Petishonnan ku wordu entregá despues di e fecha límite no ta keda trata.

Advertisement

Pèrmit pa presentashon musikal

Pa eventonan públiko i presentashon di gruponan musikal, manera gaita, aguinaldo, barí i tambú, un pèrmit ta obligatorio.

Ademas di e pèrmit, mester notifiká e presentashon na departamento di tráfiko di Kuerpo Polisial Hulanda Karibense por lo ménos dos dia adelantá. Pa presentashonnan na e kiosko na Plaza Fraternan di Tilburg, e notifikashon mester wordu hasi por lo ménos un siman adelantá.

Na e kiosko, presentashonnan ta permití solamente riba djadumingu i pafó di e oranan di misa na Misa San Bernardo.

No ta otorgá pèrmit pa presentashon na e siguiente lugánan:

• Henter Kaya Korona.
• Ons Hoekje na Kaya Avelino J. (Abechi) Cecilia.
• Skina di Kaya L.D. Gerharts i Kaya Lib. Simon Bolivar.
• Skina di Kaya Grandi i Kaya L.D. Gerharts.
• Kaya Nikiboko Nort i Kaya Nikiboko Sùit.
• Kas di Hadrei na Bulevar Miguel Pourier.

Entrega di petishon i uso di vürwèrk

Por entregá petishonnan pa pèrmit digitalmente via wèpsait di Entidat Públiko Boneiru. Pa benta di vürwèrk riba kaya, mester pidi pèrmit nesesario pa mas tardá 6 di novèmber 2026.

Organisadónan ku ta usa vürwèrk durante nan evento mester tuma kontakto adelantá ku Selibon NV tokante gastunan di limpiesa òf un suma di garantia. E komprobante di pago mester wordu agregá na e petishon pa pèrmit.

Buska pèrmitnan

Pèrmitnan ku pidi na tempu i ku a keda otorgá mester buskánan pa mas tardá 17 di desèmber 2026, na Kaya Industria Pariba 28.

Entidat Públiko Boneiru ta indiká ku organisá un evento, hasi un presentashon musikal òf bende òf tira vürwèrk sin pèrmitnan rekerí por resultá den medida di Entidat Públiko Boneiru òf polis.