Entidat Públiko Boneiru (EPB), pa medio di e departamento di Enseñansa Obligatorio (Leerplicht), ta hasi un yamada na tur mayor i kuidadó di mucha ku ainda no a inskribí nan yu na un skol pa e próksimo aña eskolar.

Segun artíkulo 6 di e Lei di Enseñansa Obligatorio BES, mayornan i kuidadónan tin e obligashon legal di pèrkurá ku nan yu ta inskribí na un skol. Esaki ta konta tantu pa muchanan ku mester ta bayendo skol kaba, komo pa esnan ku ta bai kumpli 4 aña durante di e aña eskolar 2026/2027. For di e momento ku un mucha hasi 4 aña, e mester por drenta skol mesora.

E departamento di Enseñansa Obligatorio a mustra ku nan tin komprenshon pa e situashon di e último aña eskolar, kaminda tabatin un skarsedat di kupo lugá den enseñansa. Pero, mientrastantu e asuntu aki a keda solushoná. Danki na diferente kolaborashon intensivo, tin sufisiente lugá disponibel atrobe pa e aña eskolar nobo. Debí ku e problema di espasio no t'ei mas, gobièrnu ta enfatisá ku no tin ningun motibu pa tarda ku inskripshon.

E derecho riba enseñansa ta importante pa desaroyo di kada mucha i p’esei ta krusial pa inskribí e muchanan na tempu, pa asina nan por kuminsá maske ta for di promé dia di skol òf net ora nan hasi e edat di 4 aña.

E departamento a spièrta ku si mayornan òf kuidadónan keda sin inskribí nan yu, departamento di Enseñansa Obligatorio por lanta un investigashon mesora. Si un mayor no kumpli ku loke lei ta eksigí, e ta kore riesgo ku lo tuma paso hurídiko kontra di dje, loke por kondusí na un prosèsverbal òf un but bastante pisá.

Entidat Públiko Boneiru ta supliká tur mayor i kuidadó pa pone atenshon riba esaki, asumí nan responsabilidat i inskribí nan yu mas pronto posibel pa asina evitá kualke problema ku hustisia i pa no perhudiká enseñansa di e mucha.

Advertisement