EPB ta kapasitá profeshonalnan pa empoderá gruponan vulnerabel

Gobernashon i Polítika

EPB ta kapasitá profeshonalnan pa empoderá gruponan vulnerabel

Pa AC 28 Aug, 2026 5 Min Lesa 2 Bishitante

Entidat Públiko Boneiru (EPB) a kuminsá e siman akí ku un entrenamentu Train the Trainers – Empoderamentu di Hende Muhé, dirigí na profeshonalnan ku ta traha ku gruponan vulnerabel, spesialmente hende muhé hóben.

E entrenamentu ta dura sinku dia i ta sigui ku un entrenamentu on-the-job na tres organisashon partisipante. Desde ougùstùs di aña pasá, EPB, via Direktorado Komunidat i Kuido, huntu ku Stichting Lezen en Schrijven di Hulanda, ta traha riba empoderamentu di profeshonalnan. Aña pasá, mas ku 30 profeshonal a sigui entrenamentu tokante empoderamentu, paternidat, finansa i trabou.

Ku e programa nobo, profeshonalnan ta haña konosementu, abilidat i instrumentonan práktiko pa guia hende na mas outonomia i independensia ekonómiko. E enfoke ta spesialmente riba hende muhé for di 16 aña, inkluyendo mamanan soltero ku ta enfrentá desempleo, debe, violensia doméstiko i oportunidatnan limitá den enseñansa i desaroyo.

Durante e entrenamentu on-the-job, e profeshonalnan lo pone nan konosementu nobo den práktika i kompartí loke nan a siña ku koleganan i otro profeshonalnan.

Durante e seremonia di inisio, diputado Silberie a enfatisá e importansia di e ròl di profeshonalnan: “Boso por hasi e diferensia mirando no solamente loke un hende no por, sino hustamente loke un hende sí por i kua ta e posibilidatnan ku tin ainda.”