Festival di Regatta di ayera a terminá na 3 or di mainta, pero ku desilushon. Despues di un retraso di un ora durante e evento, kantante Luis Moka i banda Cache Deluxe, e dos último acts di e anochi, no por a kompletá nan presentashon debí na interupshon abrupto pa por kumpli ku e ora límite di 3or di mainta.

Durante di e evento, e organisashon a indiká ku tabatin un fayo tekniko, loke a resultá den un retraso di un ora. E retraso aki a afektá e programa i, na final, e dos último acts a keda ku ménos tempu pa presentá e show ku nan a prepará.

Advertisement

Tantu Luis Moka komo Cache Deluxe a keda hopi desapuntá, pasobra nan no por a terminá loke nan a prepará i invertí pa e presentashon. Pa e artistanan, e situashon ta representá no solamente un desilushon, sino tambe un oportunidat pèrdí pa presentá nan trabou kompletu na públiko.

Ounke e Regatta a terminá na e ora stipulá, e situashon ta lanta pregunta tokante planifikashon i maneho di e retraso. Si e programa a kuminsá un ora mas laat pa motibu di un fayo tekniko, tabatin mester di un plan pa atendé e retraso sin laga e último artistanan paga e konsekuensianan di e situashon.

Ademas, e manera ku organisashon a sugerí e presentenan pa kana den direkshon di parke Wilhelmina, ku un komentario ku a hopi a persibí komo sarkástiko, a agregá mas desilushon na final di e evento.

E situashon ta pone enfoke riba e importansia di bon koordinashon, planifikashon i komunikashon ku artista i públiko. Un fayo tekniko por sosodé na kualke evento, pero e manera ku organisashon ta atendé e konsekuensianan ta determiná kon e evento ta terminá pa tur esnan envolví.