Papiamentu
Fundashon Tienda pa Konsumidó Boneriano (FTPKB) ta pidiendo atenshon pa un posibel riesgo di seguridat relashoná ku e ko’i hunga popular “Squishy Dumpling”, despues ku un mucha na Boneiru a eksperensiá iritashon di kueru na su kara ora e ko’i hunga a habri durante hungamentu.
Segun FTPKB, e keho a motivá un investigashon preliminar di e organisashon. Durante un evaluashon di un ehemplar similar, FTPKB a notá un holó fuerte ku nan a deskribí komo asèton i gasolin. E opservashon aki no a ser konfirmá pa un laboratorio, pero a generá preokupashon tokante e posible presensia di supstansianan kímiko volátil.
E tienda lokal ku tabata bende e produkto a koperá ku FTPKB i a stòp di bende e ko’i hunga boluntariamente mientras ku tin mas klaridat tokante seguridat di e produkto.
FTPKB a señalá ku e tema no ta limitá solamente na e ko’i hunga en kuestion. E organisashon ta pone enfoke riba e falta di posibilidatnan den Boneiru i den e region Karibense Hulandes pa hasi análisisnan kímiko di produktonan di konsumidó. Segun FTPKB, laboratorionan lokal ta enfoká prinsipalmente riba investigashon médiko i mikrobiológiko, miéntras ku tèstnan kímiko spesialisá normalmente mester ser manda na laboratorionan den eksterior.
Segun FTPKB, e situashon ta lanta pregunta tokante supervishon di produktonan ku no ta kuminda (“non-food products”) na Boneiru, i tokante kua instansia tin responsabilidat pa kontrolá òf saka produktonan potensialmente insigur for di merkado.
E fundashon ta pidi personanan ku a kumpra un Squishy Dumpling pa muchanan pa no usa e ko’i hunga temporalmente i pa tene esaki for di alkanse di muchanan. Den kaso di iritashon òf otro kehonan físiko, FTPKB ta rekomendá pa konsultá un dòkter.
Kargando komentarionan...