Konsumidónan na Boneiru lo paga ménos pa gasolin, diesel i gas di kushina for di djabièrnè 28 di ougùstùs 2026. Gobièrnu a anunsiá un adaptashon den preisnan ofisial di kombustibel despues di bahada den preisnan internashonal i preis di kompra mas abou.

Preis di Mogas 95 (gasolin) lo baha di USD 1,70 pa USD 1,64 pa liter, ku ta representá un bahada di 6 sèn pa liter. Tambe e preis di gasoil/diesel lo baha di USD 1,38 pa USD 1,32 pa liter, igualmente un redukshon di 6 sèn pa liter. Pa loke ta trata kerosin, e preis lo keda meskos ku aktualmente, na USD 0,81 pa liter.

Konsumidónan ku ta usa gas di kushina lo mira un alivio den nan gastunan mensual. E preis di un bòter grandi di LPG (100 lbs.) lo baha di USD 57,00 pa USD 54,00, un diferensia di USD 3,00. Bòter chikitu di LPG (20 lbs.) lo baha di USD 12,00 pa USD 11,00, ku ta un redukshon di USD 1,00.

Segun gobièrnu, e adaptashon ta resultado di desaroyonan resien riba merkado internashonal di petroleo i kombustibel. Kalkulashon di preis ta inkluí diferente komponente manera preis di kompra, transporte, margen di distribushon, akseins, ABB i otro faktornan regulatorio. Gobiernu a indiká ku e tarifanan nobo ta keda determiná den kuadro di e regulashonnan fiskal vigente pa Hulanda Karibe, inkluyendo medidanan tokante akseins ku a keda na vigor durante añanan resien.

Advertisement

E preisnan nobo ta drenta ofisialmente na vigor for di 28 di ougùstùs 2026.