Ku komienso di aña eskolar nobo, programa Kuminda di Skol Saludabel ta sigurá kontinuidat di su mishon pa nutri hubentut di Boneiru. Alumnonan di tantu enseñansa básiko públiko komo di enseñansa sekundario ta sigui risibí un selekshon di fruta fresku i variá tur dia na skol. E inisiativa aki, ehekutá bou di direkshon di GGD Bonaire, ta buska pa mehorá konsentrashon i rendimentu eskolar dor di promové hábitonan alimentisio saludabel for di un edat hóben.

Un di e pilanan mas fuerte di e proyekto aki ta integrashon di komunidat lokal den suministro. E programa no ta simplemente un distribushon di kuminda, sino tambe ta uni edukashon ku sektor agríkola di nos isla.

Advertisement

Dioralene Leocadia, Koordinadó di e Programa Kuminda Saludabel pa Skol a amplia riba e impakto positivo di e kooperashon aki entre GGD i Entidat Públiko Boneiru. El a indika ku Mediante un koperashon estrecho ku provedornan lokal, ta logra integrá fruta fresku ku ta bini direktamente for di kunukeronan di Boneiru. Esaki ta permití nos ofresé produkto di kalidat altu na alumnonan, miéntras nos ta duna un respaldo kualitativo na agrikultornan lokal.

E enfoke aki ta krea un modelo sostenibel kaminda benefisio ta; Akseso diario na alimento nutritivo ku ta yuda na nan desaroyo físiko i mental di alumnonan i tambe duna sosten direkto na e ekonomia lokal i stimulashon di produkshon agríkola na Boneiru.

Ku kontinuidat di e inisiativa aki, GGD Bonaire ta re afirmá su kompromiso di krea un ambiente di siñansa integral, kaminda salú di nos hubentut i fortalesimentu di rekursonan di nos isla ta kana man den man.