31 di desèmber 2028 ta e fecha ophetivo ku a keda palabrá entre Gezaghèber John Soliano i gobièrnu di Reino pa realisashon di un sentro nobo di maneho di shushi na Boneiru. E meta prinsipal di e proyekto aki ta pa ehekutá un solushon duradero i sostenibel pa e problema di shushi na Boneiru i pone un paro definitivo na operashon di sentro aktual na Lagun.

E fecha di 31 di desèmber 2028 ta reflehá un obligashon formal i un promesa no solamente di gobièrnu di Reino, sino tambe un responsabilidat pa kuida salú i bienestar di komunidat. Gezaghèber Soliano a enfatisá ku e proyekto aki ta un paso i tarea grandi ku ta eksigí koperashon i trabou konhunto entre OLB, Sekretario di Estado i diferente ministerio den Reino.

Advertisement

Pasonan den e trayekto i planifikashon:

• A keda palabrá ku pa òktober 2026 lo mester tin e estudio kla pa determiná e area i sitio ideal pa e sentro nobo;
• Konforme estudionan di eksperto, lo duna kontenido na e fase di diseño, pa asina kalkulá e invershonnan finansiero i rekursonan nesesario pa e ehekushon;
• Sekretario di Estado i Gezaghèber lo tene evaluashon kada tres luna pa sigurá ku ehekushon i planifikashon ta kana segun skema stipulá.

Aparte di midimentu nan tékniko ku lo wòrdu implementá, e plan ta duna un prioridat haltu na komunikashon transparente. Lo bai tin un plan di komunikashon pa tene habitantenan informá na tur momento. Ademas, lo publiká resultadonan di midimentu nan di airu riba website ofisial di RIVM pa asina pueblo por komprondé e proseso, e resultado i kualke riesgo envolví.