Gobièrnu Hulandes lo tuma un ròl mas fuerte den e situashon ambiental i di salú públiko na lèntfel di Selibon na Boneiru. E desishon aki ta sigui despues di krítikanan kresiente tokante e situashon di lèntfel.

Den un karta na Tweede Kamer, Sekretario di Estado pa Infrastruktura i Maneho di Awa. Annet Bertram, a presentá un aserkamentu nobo pa atendé e problemátika ku ta eksistí kaba hopi aña na Selibon Lagun. E lèntfel ta wòrdu relashoná ku polushon, kandela ku ta ripití regularmente i preokupashonnan serio tokante salú di habitantenan den serkania.

E gabinete a rekonosé ku e situashon ta un menasa pa medio ambiente i salú públiko. Rapòrtnan di Ombudsman Hulandes, ILT i representante di Reino a indiká ku e situashon ta urgente i ku mester di akshon rápido.

Un di e medidanan mas importante ta e plan pa transferí responsabilidat pa pèrmitnan ambiental i enforsamentu di lèntfel for di gobièrnu lokal pa Ministerio Hulandes di Infrastruktura i Maneho di Awa.

Selibon lo wòrdu reklasifiká komo un kompania di riesgo mas haltu, loke lo permití ILT pa hasi supervishon direktamente riba pèrmitnan, inspekshonnan i enforsamentu na Boneiru.

Medidanan inmediato ya ta den marcha

Entre e medidanan ku ya a ser implementá tin:

• kompra di kompaktornan i trùknan nobo;
• mas material di tapa pa mihó maneho di lèntfel;
• mas monitoreo i prevenshon di kandela.

Tambe a ser aprobá un proseso mas rápido pa un sekshon nobo di lèntfel, komo un solushon temporal te ora e lugá sera na 2028.

Apesar di yamadanan pa sera lèntfel inmediatamente, gobièrnu Hulandes ta indiká ku Boneiru mester di un plan nobo promé, di maneho di desecho.

Gobièrnu Hulandes lo instalá un ret di monitoreo pa sigui e kalidat ambiental i eventual riesgonan pa salú rondó di Selibon. Tambe ta konsiderando posibel plannan di reubikashon pa residentenan ku ta biba den serkania di e lèntfel.

Mas detaye tokante e plan integral lo ser presentá na Tweede Kamer mas despues den 2026.

Advertisement