Den mardugá di djaluna 25 di mei, Kuerpo Polisial Hulanda Karibense (KPCN), alrededor di 3or di mardugá a detené un shofùr di 38 aña di edat na Kaya Karpitan. Un patruya di polis a keda dirigí na e sitio pa un situashon sospechoso riba kaminda públiko. Na yegada agentenan a topa un vehíkulo ku tabata stashoná meimei di kaminda ku e motor ainda sendé. Ora e polisnan a bai wak den e vehíkulo, nan a deskubrí ku e shofùr tabata drumí den un soño profundo tras di stür.

E agentenan mester a hasi hopi esfuerso pa logra lanta e hòmber for di su soño. Na momento ku e shofùr a lanta,  tabata opvio ku e tabata bou di influensia fuerte di alkohòl.

Ora e polisnan a pidié pa baha for di e vehíkulo i a komuniká kuné ku e ta keda detené, e hòmber a para duru i a resistí fuertemente kontra di su aresto. Pa e motibu aki, e agentenan mester a usa e forsa nesesario pa por a dominá e sospechoso i manehá e situashon.

Durante e kòntròl di e dokumentonan rekerí pa lei, a keda konfirmá ku e hòmber no tabatin un reibeweis bálido pa por a manehá e vehíkulo.

KPCN a hiba e sospechoso pa warda di polis, kaminda e ta keda presentá dilanti di un fiskal outoridat. Finalmente e hòmber a keda detené pa e siguiente delitonan formal: Manehá un vehíkulo bou di influensia di alkohòl, resistensia kontra aresto i outoridat i tambe manehá sin un reibeweis bálido.

Advertisement