Minister Mirjam Sterk di Kuido di Durashon Largu, Hubentut i Deporte ta indiká ku mester traha mas riba prevenshon, kuido, sosten sosial i kuido pa hóben na Boneiru, Sint Eustatius i Saba. Segun Sterk, e meta ta pa fasilidatnan di kuido na Hulanda Karibense alkansá un nivel ekivalente ku Hulanda Oropeo.

E gabinete ta enfatisá prevenshon, pasobra hopi afekshon króniko ta relashoná ku estilo di bida i ambiente. Un di e akshonnan ta kampaña NIX18 karibense, ku pronto lo kuminsá na Boneiru pa hasi mayornan i doñonan di tienda konsiente di e límite di 18 aña pa konsumo di alkohòl. Tambe a renobá lugánan di hunga na tur tres isla pa muchanan por hunga i move di un manera seif.

Advertisement

Kuido mas serka di kas

Kuido di promé liña ta un punto importante den e plan. Na Boneiru, tur ofisina di dòkter di kas ta kumpli ku kalidat akreditá pa NHG. Na Saba i Sint Eustatius lo sigui fortifiká e promé liña di kuido.

Sentronan di salubridat di Saba i Sint Eustatius ta traha mas estrecho ku hòspital na Boneiru. Den futuro, por evaluá potrètnan di radiologia riba distansia. Tambe lo intensifiká kolaborashon ku Guadeloupe pa mehorá akseso pa kuido di emergensia.

Mehorashon den traslado médiko

Debí na eskala chikí di e islanan, traslado médiko ta inevitabel. Kada aña tin alrededor di 7.000 traslado médiko, mayoria di kua ta kana bon. Sinembargo, un investigashon di Nationale ombudsman a mustra ku algun pashènt ta eksperensiá problema ku informashon, guia personal i tratamentu di keho.

Pa mehorá esaki, a introdusí diferente medida, inkluyendo un wèpsait nobo pa kuido i hubentut, mihó akseso telefóniko i un prosedura di keho mas aksesibel. Pa añanan benidero, e gabinete ke sigui mehorá e servisio, inkluyendo investigashon riba un portal digital kaminda pashèntnan por sigui nan dato i progreso.

Lo investigá tambe kon pashèntnan por haña mas posibilidat di eskoho entre dunadó di kuido kontratá den parti karibense di Reino.