Un ambiente di orguyo i felisidat a reina na IKC San Bernardo, kaminda skol a rindi un homenage spesial na e ekipo kampion di baseball Pony League di Boneiru, ku resientemente a logra título di kampion di Karibe.

E homenage a tuma lugá den presensia di alumno, mayor, maestro i otro invitadonan, ku tur a reuní pa selebrá e logro deportivo ekstraordinario di e hóbennan. Durante e aktividat, diferente palabra di apresio i felisitashon a wòrdu kompartí ku e ekipo, ku a pone Boneiru riba mapa den deporte regional.

Na nòmber di e skol, Juf Miriam Paal a hiba palabra i a ekspresá su orguyo pa e alumnonan i deportistanan ku a representá Boneiru ku dedikashon, disiplina i perseveransia. El a enfatisá ku e triunfo no solamente ta un logro deportivo, sino tambe un inspirashon pa otro muchanan sigui lucha pa nan meta.

Diputado Joselito Statie tambe tabata presente i a hiba palabra bisando ku e éksito di e ekipo ta mustra ku ku trabou duru, union i sosten di komunidat, hóbennan por alkansá kosnan grandi. El a felisitá tur hungadó, entrenadó i mayornan ku a kontribuí na e prestashon históriko aki.

Na final team di Energia sostené un entrevista ku Coach di e team Kumar Piar ku a indika ku e trabou ku a tuma logá pa awe e grupo por ta kampion tabata hopi duru i e la indika di ta kontentu ku e elogio ku tur e atleta i coachnan ta risibiendo ku nan por sinti ku nan ta wòrdu balorá pa tur e tempu ku nan a hinka den e mucha i trainingnan.

Advertisement