Un investigashon nobo di Economisch Bureau Amsterdam (EBA), enkargá pa Fundashon Tienda pa Konsumidó Boneriano (FTPKB), ta mustra ku tin produkto na Boneiru ku ta kontené sustansia ku ta prohibí òf limitá den Union Europeo (UE).

E investigashon "De Prijs van Schadelijke Producten" ta indiká ku, komo Boneiru no ta forma parti di e merkado interno di UE, hopi di e regulashonnan europeo tokante seguridat di produkto no ta aplikabel direktamente riba na Boneiru. Boneiru ta dependé hopi di importashon, inkluyendo produkto for di Merka, kaminda regulashon pa sierto produkto i sustansia por ta menos estrikto ku den UE.

Advertisement

Produktonan ku a keda investigá

FTPKB a hasi un sondeo den supermerkadonan, ku EBA a analisá despues basá riba e ingredientenan ku ta menshoná riba e etikèt. E selekshon no ta representativo pa henter e merkado, pero a identifiká diferente ehèmpel di produkto ku ta kontené sustansia ku den UE ta prohibí òf ta bou di restrikshon.

Entre e ehèmpelnan ta:

• AXE Adrenaline Charge Up 48h Roll-On - deodorante ku ta kontené Lilial.
• FA Glamorous Moments Non Stop Fresh - deodorante ku ta kontené Lilial.
• Olay Fresh Radiance Body Wash - shower gel ku ta kontené sustansianan regulá den UE.
• Neutrogena Anti-Wrinkle Deep Wrinkle Night Moisturizer - krema pa kara ku ta kontené parabenen, retinol i BHT.
• Essentials Foaming Handsoap Pomegranate - habon ku ta kontené MI/MCI.
• Cantu Tea Tree & Jojoba Hair & Scalp Oil - zeta pa kabei ku ta kontené Lilial.
• Cantu Shea Butter Moisturizer Spray - spray pa kabei ku ta kontené Lilial.
• Just For Me Natural Hair Milk Smoothing Edges - produkto pa kabei ku ta kontené Lilial.
• Aunt Jackie’s In Control Conditioner - krema ku ta kontené un sustansia regulá.
• Ostwint Color Wax - produkto pa kolo di kabei ku ta kontené sustansianan bou di restrikshon den UE.
• Gain Liquid Detergent - detergente ku ta kontené, entre otro, sodium borate.
• Creolina Desinfectante - desinfektante ku ta kontené creosootolie.
• Fabuloso Original Multi-Purpose Cleaner - produkto pa limpiesa multiuso ku ta kontené sustansianan ku ta bou di regulashon den UE.
• Mighty Kleen Laundry Detergent - detergente ku ta kontené sustansianan ku ta bou di regulashon.
• Mountain Dew Citrus Blast - refresko ku ta kontené E315 i E385, ku no ta permití den refresko den UE.

E rapòrt no ta bisa ku tur e produkto aki ta peligroso pa usa. E ta bisa ku algun tin ingrediente ku ta prohibí òf regulá diferente den Union Europeo (EU). E investigashon na tienda tabata limitá i no ta representativo pa tur produkto ku ta bende na Boneiru.

Posibel riesgo pa salú

E investigashon ta deskribí posibel riskonan manera alergia di kueru, disturbionan hormonál, efektonan riba sistema nervioso i sistema di reprodukshon, i posibel efektonan karsinogéniko. EBA ta enfatisá ku e presensia di un sustansia no ta nifiká automátikamente ku un produkto ta hasi daño; e riesgo ta dependé, entre otro, di konsentrashon i grado di eksposishon.

E investigashon ta rekomendá mas estudio, inkluyendo prueba di laboratorio riba fruta, berdura i otro produktonan pa investigá posibel residuo di pestisida. Tambe un muestra mas grandi di produkto por duna un mihó bista riba e magnitut di e situashon.

E rapòrt a keda publiká na yüli 2026 i ta prepará pa EBA na enkargo di FTPKB, ku komo meta ta kontribuí na un mihó protekshon di konsumidónan na Boneiru.