Jan Helmond a pidi Rei pa otorg’é retiru komo Representante di Reino interino ku efektu for di 1 di yanüari 2027. Esaki a sali na kla den un komunikado oficsial di Ministerie van Binnelandse Zaken en Koninkrijkrelaties.

Segun e komunikado, Helmond su nombramentu segun lei lo sigui bálido te na e momentu ku e kumpli 70 aña di edat. Sinembargo, el a disidí di terminá su funshon mas promé. Te na 1 di yanüari 2027, Helmond lo sigui ehersé su tareanan komo Representante di Reino interino. Despues di esaki, el ta planiá pa sigui aktivo komo konsehero i ‘netwerker’ independiente for di su propio kompania.

Advertisement

Helmond a fungi den e funshon durante nuebe aña. Den su reakshon, el a indiká ku e ta konsiderá e momento aki komo un momento natural pa otro persona asumí e puesto. “Despues di a fungi nuebe aña den e funshon aki a yega tempu pa un otro tuma over. E ta un momentu natural tambe pa motibu ku e diskushon tokante renobashon di WolBES i FinBES ku tur probabilidat ta deseá un otro tipo di mandatario,” Helmond a bisa.

El a referí tambe na diferente desaroyo ku a tuma lugá durante su periodo den e funshon, manera rekonstrukshon despues di orkan, e periodo di COVID-19, diferente kambio di gobièrnu i e intervenshon atministrativo na Sint Eustatius. “Hopi kos a drecha pero ainda tin hopi kos mas pa hasi,” segun Helmond.

Sekretario di estado di Relashonnan di Reino, Eric van der Burg, a reakshoná riba e anunsio di Representante di Reino Jan Helmond. Den un deklarashon, Van der Burg a gradisí Helmond pa su trabou durante e último añanan na Boneiru, Sint Eustatius i Saba. “Ku esaki, no solamente nos ta bai sinti falta di un mandatario eksperensiá, pero tambe di un persona ku un kurason grandi pa Hulanda Karibense,” Van der Burg a deklará. E sekretario di estado a agregá ku Helmond a kontribuí na e tres islanan ku un manera di traha enfoká riba resultado i konekshon. Van der Burg a indiká tambe ku e ta sperando pa presentá, mas pronto posibel, un proposishon tokante e remplaso di Helmond komo Representante di Reino interino entrante 1 di yanüari 2027.