Representante di Reino Interino, Jan Helmond, a nombra i huramentá sra. Jeaninne Wong-Loi-Sing komo gezaghèber interino di Boneiru, ku efekto for di 21 di yüli 2026. E seremonia di huramentashon a tuma lugá den sala di konseho insular.

Den su funshon nobo, Wong-Loi-Sing lo asumí tur responsabilidat i outoridat legal ku ta pertenesé na e funshon di gezaghèber durante ousensia di gezaghèber John Soliano. Ku esaki ta garantisá kontinuidat den ehekushon di e tareanan di e gezaghèber.

E nombramentu ta sigui despues di desishon di sra. Ingrid Sealy pa retirá su mes komo gezaghèber interino. Sealy a indiká ku ya e no por kombiná e funshon ku su responsabilidatnan komo hefe di SSO CN. Jan Helmond a gradis’é pa su dedikashon i esfuerso durante e añanan ku el a sirbi komo gezaghèber interino.

Sra. Jeaninne Wong-Loi-Sing, a krese na Boneiru, i a dediká gran parti di su karera na promové di integridat den sektor públiko. Su trabou a keda rekonosé internashonalmente ku e prestigioso premio "Ien Dales Integriteitsaward" na Hulanda Oropeo. Tambe e ta konosí pa su kompromiso sosial i su konosementu profundo di komunidat boneiriano.

Representante di Reino Interino Jan Helmond a bisa ku e ta hopi kontentu ku Wong-Loi-Sing a aseptá e enkargo.

“Ku sra. Wong-Loi-Sing, Boneiru ta haña un profeshonal kapas i eksperensiá komo gezaghèber interino. Mi ta dese’é hopi éksito den ehekushon di su funshon,” Helmond a deklará.

Wong-Loi-Sing a kuminsá ofisialmente ku su tareanan komo gezaghèber interino awe, 21 di yüli 2026.

Advertisement