Representantenan di diferente organisashon den kadena di imigrashon na Hulanda Karibense a reuni na Boneiru pa e minikonferensia anual. Durante e enkuentro, nan a diskutí e desaroyo di e kadena, formanan nobo di kolaborashon i e posibilidatnan pa apliká teknologia den proseso di trabou.

Un di e temanan prinsipal tabata uso di teknologia nobo, inkluyendo inteligensia artifisial (AI), chatbots, drone, algoritmo i identifikashon biométriko. Oradornan invitá di Servisio di Imigrashon i Naturalisashon (IND) i di e programa SBIR a presentá desaroyonan relashoná ku AI i e uso di chatbots den proseso laboral.

Advertisement

E partisipantenan a eksplorá kon e teknologianan akí por kontribuí na un ehekushon mas efektivo di tareanan di imigrashon. Tambe nan a interkambiá idea riba interkambio di informashon, aliansanan entre organisashonnan i e posibel partisipashon di organisashonnan eksterno, manera organisashonnan sosial i dunadónan di servisio partikular, den proseso spesífiko.

Durante e mini konferensia, a reflehá tambe riba e desaroyo di e kadena di imigrashon desde 10 di òktober 2010 (10-10-10), e situashon aktual i e retonan pa futuro. E diskushonnan a inkluí e progreso di akshonnan formulá durante enkuentronan anterior i posibilidatnan pa sigui mehorá kolaborashon entre e organisashonnan embolbí.

E mini konferensia anual ta reuní e organisashonnan pa interkambiá konosementu, evaluá desaroyonan i diskutí oportunidatnan pa mehorá ehekushon di tareanan komun den kadena di imigrashon na Hulanda Karibense.

E edishon di e aña akí a keda organisá na Boneiru pa Servisio di Regreso i Salida, Koninklijke Marechaussee, IND CN i Direktoraat Maneho di Imigrashon di Ministerio di Hustisia i Siguridat.