Klimaatzaak Boneiru ta drenta un fase nobo, ku diferente momento importante riba agenda próksimo siman. Riba 15 di sèptèmber, Hoger Beroep in Gerechtshof Den Haag ta kuminsá ofisialmente, despues ku estado a apelá sentensia ku a keda duna anteriormente den e kaso di klima.

Riba 28 di yanüari, habitantenan di Boneiru, huntu ku Greenpeace Nederland, a gana Klimaatzaak Boneiru kontra estado Hulandes. Na april, estado Hulandest a anunsiá ku e ta bai den hoger beroep kontra e sentensia. Ademas di e hoger beroep, riba 15 di sèptèmber, Gerechtshof lo trata tambe un petishon di suspenshon presentá. Ku e petishon aki, estado Hulandes ta pidi pa suspende temporalmente e obligashon pa kumpli direktamente ku mitigashon di e sentensia.

Advertisement

Rechtbank Den Haag a disidí ku estado Hulandes tin 18 luna, te ku 28 di yüli 2027, pa stipulá metanan di klima nobo i obligatorio pa e ekonomia kompletu, inkluyendo transporte aereo i marítimo, ku komo meta pa baha emishon. E sentensia ta apliká direktamente, mientras ku e kaso di Hoger Beroep lo ta andando.

Gerechtshof lo trata promé e petishon di suspenshon. Despues, lo disidí den término kòrtiku si tin mester di un zitting òf si e ta bai direktamente na un desishon riba e petishon. Miéntras tantu, 14 di sèptèmber, Planbureau voor de Leefomgeving (PBL) lo presentá e Klimaat- i Energieverkenning. Un dia despues, riba Prinsjesdag, lo presentá Miljoenennota i Klimaat- i Energienota. E dokumentonan aki ta duna un bista riba progreso di maneho di klima i metanan ku e gobièrnu li fihá.

Segun Greenpeace Nederland, e dokumentonan por demostra si e metanan di klima por keda logra ku e maneho aktual. Tambe ta keda pendiente informashon tokante e espasio di emishon ku ainda ta disponibel pa Hulanda. Greenpeace Nederland ta indiká ku estado Hulandes ainda no a publiká informashon kompletu tokante espasio di emishon restante, apesar ku e rechtbank a konsiderá un periodo di seis luna komo rasonabel pa duna e informashon aki.

15 di sèptèmber ta bira un fecha importante pa e Klimaatzaak Boneiru, kaminda ku e kaso di Hoger Beroep i petishon di suspenshon lo wordu trata, mientras ku lo sali informashon nobo tokante maneho di klima na Hulanda.