Durante su bishita na Boneiru, Promé Minister di Hulanda, Rob Jetten, a risibí un petishon importante for di Jona Chirino, ku a wòrdu firmá pa diferente miembro di koalishon. E dokumento a keda ofisialisá komo un yamada urgente pa atenshon inmediato riba diferente tema ku ta tokando komunidat di Boneiru.

Den un entrevista ku EnergiaTV, Jona Chirino a splika ku e petishon ta kontené sinku punto kardinal ku segun koalishon, mester wòrdu tratá ku prioridat dor di outoridatnan kompetente. E puntonan aki ta enfoká riba nesesidatnan básiko di pueblo i e nesesidat di sosten i yudansa struktural pa Boneiru.

Chirino a indiká ku un di e puntonan prinsipal den e petishon ta un “Structuurvisie”, un plan di vishon stratégiko pa Boneiru ku ta mira desaroyo di e isla for di awor te na aña 2050. Segun el a splika, koalishon ta pidi gobièrnu hulandes pa konsiderá e plan aki komo un base duradero pa invertí den futuro di Boneiru i pa hasi posibel pa haña fondonan struktural ku por garantisá progreso sostenibel.

Ademas, Chirino a papia tokante esfuersonan ku koalishon a hasi pa inkluí oposishon den e proseso. Segun e, oposishon a kontribuí ku diferente sugerensia, pero no a logra yega na un akuerdo kompleto tokante e prosedura ku mester a sigui. A base di esaki, koalishon a hasi un petishon formal na Griffie pa konvoká un reunion urgente di Konseho Insular den un periodo di dos bia 24 ora.

Meta di e reunion ta pa logra amplia sosten polítiko i pa duna e petishon un karakter mas ofisial dor di trat’é durante un reunion formal di Eilandsraad. 

Advertisement