Kosto di bida na Boneiru a sigui subi den di dos kuartal di 2026. Segun sifranan preliminar di Ofisina Sentral di Estadístika (CBS), inflashon a subi te na 3,3 porshento, kompará ku e mesun periodo di aña pasa. Esaki ta representá un subida konsiderabel for di e 2,0 porshento registrá den promé kuartal di 2026. 

Kompará ku e promé kuartal di e aña aki, preisnan di konsumo na Boneiru a oumentá ku 1,8 porshento. E motor prinsipal tras di e subida aki tabata sektor di transporte, kaminda preisnan a subi ku 5,6 porshento den solamente tres luna. 

Na banda di alimentashon, preis di bèrdura fresku a subi ku 5,2 porshento, agregando mas preshon riba e kanasta básiko. Tambe e sektor di hospitalidat, inkluyendo restorant i alohamentu, a registrá un oumento di 3,2 porshento kompará ku e kuartal anterior. 

E sifranan mas resien ta indiká ku e Índise di Preis pa Konsumidó (CPI) na Boneiru a subi for di 129,6 den e promé kuartal pa 131,8 den di dos kuartal di 2026, un señal ku inflashon ta sigui presente den ekonomia lokal. 

Sint Eustatius

Na Sint Eustatius, inflashon a subi te 5,2 porshento den di dos kuartal di 2026, kompará ku 4,6 porshento den e promé kuartal. Preisnan a oumentá ku 1,5 porshento kompará ku e kuartal anterior, prinsipalmente debí na gastunan di transporte. Gasolin a bira 7,2 porshento mas karu, mientras ku tarifa di buelo a subi ku 10,5 porshento. Tambe preis di bèrdura fresku a sigui subi.

Saba

Saba a registrá un inflashon di 5,0 porshento, un subida for di 3,4 porshento di promé kuartal. Kompará ku e kuartal anterior, preisnan di konsumo a oumentá ku 2,3 porshento, e subida mas grandi di e tres islanan. E oumento tabata impulsá prinsipalmente pa transporte, ku gasolin 20,9 porshento mas karu i tarifa di buelo 9 porshento mas haltu. Ademas, preisnan di kuminda i bebida no-alkohóliko a subi 2,9 porshento, prinsipalmente pa motibu di bèrdura fresku, kuminda di fris i kòfi mas karu.

Ounke ku e nivel di inflashon aktual ta muchu mas abou ku e pikonan eksperensiá den 2022, e dato nan ta mustra ku gastunan di transporte i alimentashon ta keda e faktornan mas importante tras di e subida kontinuo di preisnan na Boneiru. 

CBS a indiká ku e sifranan pa di dos kuartal di 2026 ainda ta preliminar.

Advertisement