Liseo Boneriano a selebrá un logro úniko den enseñansa despues ku un grupo grandi di studiante i dosente a logra e nivel mas altu den e eksámen internashonal di Cambridge English.

Durante un seremonia spesial, 19 studiante di mavo, havo i vwo, huntu ku 8 dosente, a risibí nan sertifikado ofisial di Cambridge English. E partisipantenan a wòrdu di tèst riba nan abilidat di papia, skucha, lesa i skirbi ingles i e resultado a superá tur ekspektativa.

Kuater di e studiantenan a logra e prestigioso nivel C2, konsiderá komo e nivel di mas altu di dominio di idioma ingles den e sistema di Cambridge. E nivel aki ta wòrdu kompará ku un dominio kasi nativo di e idioma.

Segun Liseo Boneriano, e skol awor por yama su mes e úniko instituto den Karibe kaminda studiantenan di tur nivel di enseñansa sekundario tin e oportunidat di alkansá e nivelnan di Cambridge English.

Preparashonnan pa e eksámen a tuma lugá durante henter e aña eskolar bou di guia di dosente nativo di ingles, Jasmin Divine. El a traha intensivamente ku tantu studiantenan komo dosentenan pa fortifiká nan abilidat komunikativo i akadémiko den ingles.

Maneho di Liseo Boneriano a ekspresá orguyo pa e dedikashon i perseveransia di tur partisipante. Segun nan, e sertifikadonan internashonal akí ta habri porta pa estudio avansá den exterior i ta amplia oportunidatnan profeshonal rònt mundu.

Durante e seremonia, Jasmin Divine a deskribí e proseso komo un reto grandi, pero tambe komo un eksperensia ku a hiba tur partisipante na un nivel mas altu. Divine a finalisá uzando un dicho na ingles; “Language isn’t about perfection, it's about connection,” ku ta nifiká ku idioma no ta tokante perfekshon, sino tokante konekshon. 

Ku e resultadonan eksepshonal akí, Liseo Boneriano ta sigui pone enfoke riba kalidat di enseñansa, internashonalisashon i edukashon multilingual.

Advertisement