Un kaso di maltrato di fauna a keda raportá den bario di Amboina na Boneiru, kaminda varios lora a keda enkontrá morto bou di kondishonnan ku ta sospechá ku nan a keda tirá.

Segun informashon inisial ku Energia TV a risibí, ta trata di aproksimadamente 15 lora. Te awor, a enkontrá 8 kurpa kompletu den un estado avansá di deskomposishon, huntu ku pida kurpa, hala i pluma.

Bisiñanan den e área a deklará ku regularmente nan tabata tende zonidonan ku ta parse di ta disparo di un sheridan (kushishi/ gewèr di airu komprimí). Nan ta sospechá ku e loranan a keda tira mientras nan tabata para den palu pa kome fruta.

E insidente ta lanta preokupashon tokante e impakto riba e fauna lokal. Segun bisiñanan, despues di e matansa, loranan no ta bishitá e área di Amboina ku e mesun frekuensia manera promé.

Pa yega na un konklushon ofisial, un di e loranan morto lo keda someté na un eksamen forénsiko pa determiná si el a muri komo resultado di impakto di bala. Ademas, a lokalisá un lora bibu, pero ku aparentamente tin un ala seriamente dañá.

Outoridatnan kompetente a keda pone na altura di e situashon, i ta spera ku e investigashon lo determiná eksaktamente kiko a sosodé i pone e personanan responsabel pa nan akto di maltrato kontra Boneiru su lora lokal.

Importansia di Boneiru su lora lokal

E lora skouder hel (Amazona barbadensis) ta un di e simbolonan natural mas importante di Boneiru i ta un espesie protehá ku ta eksistí ainda den naturalesa. Boneiru ta un di e último lugánan na mundu kaminda e lora akí ta biba liber.

Ademas di su balor ekologiko, e lora ta forma un parti importante di patrimonio natural i kultural di Boneiru. E para ta yuda mantené balansa den naturalesa dor di diseminá simia di palu i planta nan, kontribuyendo asina na konservashon di ekosistema lokal.

Advertisement