Frakshon Movementu 21 (M21) den Konseo Insular a ekspresá preokupashon serio tokante evaluashon negativo di College financieel toezicht (Cft) riba ontwerpbegroting (OB) 2027 di Boneiru. Den un karta dirigí na Bestuurscollege, lider di frakshon Désirée Coffie a pidi klarifikashon urgente tokante proseso i e falta ku Cft a señalá.

Segun M21, Konseho Insular a risibí dia 1 di sèptèmber un karta di Cft fecha 28 di ougùstùs 2026, den kua e organismo di supervison finansiero a indiká ku nan lo no trata e presupuesto i a opta pa debolbe esaki bèk na Kolegio Ehekutivo pa mehorashon.

Advertisement

Den su evaluashon, Cft a deklará ku e “karakter struktural di defisiensia” a kontribuí na desishon pa manda e presupuesto bèk. Segun M21, e konklushon aki ta duna impreshon ku e maneho finansiero di Boneiru no a mehorá, sino kua deteriorá mas. Frakshon M21 ta señalá ku e koalishon gobernante a insistí riba nombramentu di un diputado nobo ku eksperensia finansiero, asistí pa un ex-hefe di finansas di OLB i un asesor polítiko spesialisá den asunto finansiero. Ademas, un hefe nobo di finansas a keda kontratá na kuminsamentu di e aña ku e meta pa guia e proseso di mehorashon di maneho finansiero.

Tin indikashonnan ku e Departamento di Finansas no tabata enbolbí òf no tabata enbolbí kompletamente den preparashon di e ontwerpbegroting 2027 di Boneiru manera FinBES ta eksigí. M21 ta pidi Bestuurscollege pa duna klaridat riba e ròl ku Departamento di Finansas i su hefe a hunga den e proseso, i si nan a partisipá i evaluá e begroting promé ku e dokumento a keda manda pa Cft. 

Preguntanan na Bestuurscollege

Basá riba Artíkulo 45 di Reglamentu di Ordu, M21 a presentá shete pregunta na Bestuurscollege i a pidi kontesta tantu por eskrito komo verbalmente durante e próksimo reunion di Konseho Insular.

Entre e preguntanan tin:

• Kua ta e posishon ofisial di Bestuurscollege riba e konseho di Cft?
• Si Bestuurscollege ta rekonosé e falta prinsipalnan señalá pa Cft?
• Te ki grado departamento di Finansas a partisipá den preparashon di e begroting?
• Ken a prepará e begroting si e departamento no a keda involukrá kompletamente?
• Kua medida konkreto lo ked tumá pa koregí e falta señalá pa Cft promé ku 28 di sèptèmber 2026?
• Kua medida lo keda tumá pa prevení situashonnan similar den futuro?
• Kua tabata e ròl di Gezaghèber den kaso ku e Departamento di Finansas a keda na banda durante preparashon di e dokumento.

M21 ta pidi transparensia

M21 ta konsiderá ku e opservashonnan di Cft ta hopi serio i ta meresé un splikashon kla pa Konseho Insular i komunidat. Konsehal Désirée Coffie a indiká ku nan ta spera kontesta detayá i diskushon públiko tokante estado di maneho finansiero di Boneiru.