Montantenan standarisá ku ta wòrdu usá pa determiná krédito máksimo ku un konsumidó por risibí, a keda ahustá bálido for di 1 di aprel 2026. E montantenan aki ta legalmente stipulá den lei "Wet financiële markten, BES wetgeving 2012 (Sectie 2:5)" i ta keda indeksá tur aña.

Institushonnan ku ta duna fiansa no por fia sèn paloko, paso esaki ta iresponsabel. E instansianan aki tin ku pidi sufisiente informashon tokante e situashon finansiero di e konsumidó. Nan tin ku evaluá si e kliente ta kapas i dispuesto pa paga e gastunan di un hipotek òf di un fiansa personal. Ta usa e montantenan standarisá aki pa kalkulá gastunan básiko pa mantenshon di bida, dependiendo di komposishon di e famia i e isla kaminda e persona ta biba.

E ahuste di e montantenan standarisá a keda basá riba indeksashon di preis di konsumidó di aña 2025. E preisnan a subi ku 4,3% na Boneiru, 1,8% na Sint Eustatius i 3,8% na Saba. Merkado Finansiero (AFM) a hinka e kalkulashon di indeksashon aki den un fail di Excel aktualisá. Por haña esaki, inkluso ku un tradukshon na Papiamentu, riba wèpsait di Fundashon Tienda pa Konsumidó Boneriano.

AFM a desaroyá un modelo di kalkulashon pa por determiná e máksimo kantidat di krédito ku por otorgá na un manera responsabel. Artíkulo 7:17(3) di e lei “Wet financiële markten” ta spesifiká kon mester kalkulá e kapasidat finansiero mensual di e kliente.

E evaluashon di krédito ta usa dos komponente: un parti fiho (e montante standarisá) i un parti relashoná ku e entrada di e persona. E komponente fiho ta reflehá e gastunan lokal ku ta nesesario pa mantené un sierto nivel di bida riba e islanan BES.

Advertisement