MPB i frakshon Serberie a presentá un petishon formal na Presidente di Konseho Insular pa konvoká un reunion èkstra i urgente tokante subidanan drástiko den preis di elektrisidat na Boneiru. E dos frakshonnan ta argumentá ku e oumentonan konsekutivo den tarifa ta pone un karga kada biaha mas pisá riba famia i empresarionan lokal.

Den nan karta, e frakshonnan ta referí na subidanan ku a dentra na vigor riba 1 di yanüari i 1 di yüli 2026. Segun nan, e tarifa variabel pa uso di elektrisidat a subi signifikativamente durante e periodo aki. Nan ta señalá ku, ounke e tarifa fiho mensual a keda rebahá na yüli, e rebaho no ta kompensá e oumento den e tarifa variabel ku ta forma e parti mas grandi di faktura mensual di hopi usuario.

Advertisement

MPB i Serberie ta enfatisá ku e situashon ta afektá famianan ku ya ta enfrentá limitashonnan finansiero, i ku e kostonan mas haltu di energia tambe ta pone preshon riba e sektor empresarial lokal. Segun e frakshonnan, dependensia kontinuo riba kombustibel fósil ta hasi Boneiru vunerabel pa desaroyonan internashonal ku tin influensia riba preisnan di energia.

Den e petishon, e frakshonnan ta pidi pa e reunion èkstra pa trata spesífikamente e tema di subidanan di elektrisidat i nan konsekuensia pa habitante i empresarionan. Tambe nan ke pa Kolegio Ehekutivo presentá informashon por eskrito promé ku e reunion tokante medidanan ku a keda tumá te awor, i akshonnan ku ta wòrdu konsiderá pa moderá òf kompensá e impakto di e tarifanan.

Ademas, MPB i Serberie ta pidi pa Konseho Insular tin oportunidat durante e reunion pa deliberá riba posibel moshon òf otro instrumentonan polítiko pa duna direkshon na Kolegio Ehekutivo tokante e tema.

E frakshonnan ta indiká ku urgensia di e asunto ta hustifiká un reunion riba termino mas kòrtiku posibel, mirando e impakto sosial i ekonómiko ku subidanan di elektrisidat tin riba komunidat boneriano.